13 naýryzdan bastap Qazaqstanda konferentsiia, seminar, kórme siiaqty qoǵamdyq, mádeni kópshilik sharalar ótkizýge tyiym salynady. Bul týraly premer-ministrdiń orynbasary Eraly Toǵjanov 12 naýryz kúngi brifing kezinde málimdedi.
Onyń aitýynsha, densaýlyq saqtaý, bilim berý mekemeleri, halyq kóp jinalatyn oryndar, qoǵamdyq tamaqtaný oryndary, halyqty qamtamasyz etý ortalyqtary, kommýnaldyq sharýashylyq, tamaq ónerkásibi, bazarlar, vokzal, áýejailar, qonaqúiler kúsheitilgen sanitarlyq-dezinfektsiialyq rejimge kóshedi. Buǵan qosa qarttar men múmkindigi shekteýli adamdarǵa arnalǵan meditsinalyq nysandarǵa, áleýmettik ońaltý ortalyqtaryna, múgedek balalarǵa arnalǵan oqý oryndaryna barýǵa tyiym salynady. Qoǵamdyq kólikterdi dezinfektsiialaý jumystary júredi. Saýda oryndaryndaǵy kinoteatrlar ýaqytsha jabylady. Sondai-aq, kanikýl kezinde oqýshylarǵa óńirden tys jerlerge ekskýrsiia jasaýǵa ruqsat etilmeidi.
"Orta bilim berý oryndary kanikýlǵa 2020 jyly 16 naýryz - 5 sáýir aralyǵynda shyǵady, 16 naýryzdan bastap kolledjder men JOO-lardy qashyqtan oqytýǵa, onyń ishinde bilimdi baǵalaýdyń barlyq túrlerin qashyqtan júrgizýge aýystyrý qajet" dedi ol.
Onyń aitýynsha, osy aptada ótetin "Barys" hokkei klýbynyń oiynyna kórermender qatyspaidy.
"1a, 1b, 2-3 sanattaǵy elderdegi halyqaralyq sporttyq mádeni týristik is sharalarǵa barýǵa tyiym salý siiaqty ýaqytsha sharalar qabyldanady" dedi Eraly Toǵjanov.
Ol toi, týǵan kún siiaqty kópshilik sharalardy ótkizbeýge de keńes berdi.
Beisenbilik brifing kezinde "azyq-túlik tapshylyǵy", "dúken sóreleriniń bosaǵany" týraly sybystarǵa da jaýap berdi.
- Bizde azyq-túliktiń negizgi 19 túri bar. Qazaqstan bul azyq-túlik túrleri boiynsha jarty jylǵa deiin ózin qamtamasyz ete alady. Azyq-túlik qaýipsizdigi baqylaýda, - dedi vitse-premer.
Densaýlyq saqtaý ministrliginiń málimetinshe, 4800 adam karantinde nemese úide dárigerler baqylaýynda otyr.
"12 naýryzǵa barlyǵy 96 adam dene qyzýymen jáne jedel respiratorlyq virýstyq infektsiiamen, onyń ishinde 1 «b» sanaty boiynsha – 23 adam, 2-sanat boiynsha – 38 adam, 3-sanat boiynsha – 35 adam emdeýge jatqyzyldy. Emdeýge jatqyzylǵan 96 adamnyń ishinen 52 adam shyǵaryldy. 44 adam statsionarda jatyr" delingen ministrlik habarlamasynda.
Densaýlyq saqtaý ministri Eljan Birtanovtyń aitýynsha, Qazaqstanda koronavirýsty anyqtaý boiynsha tórt memlekettiń testi bar.
- Qazir barlyq aimaqta sanitarlyq-epidemiologiialyq zerthanalar jumys istep tur. [Koronavirýsty anyqtaityn] Arnaiy tester bar. Tórt memlekettiń testi bar: Resei, Qytai, Germaniia jáne Qazaqstan. Bizde jalpy 15 myń test bolǵan. Bes myńyn paidalandyq. Qazir 10 myń bar. Qosymsha 60 myń test alyp jatyrmyz. Árbir naýqasty 2-3 testpen tekseremiz. Bul basqa memleketter paidalanyp júrgen tester. Buryn keibir jaǵdaida Ulybritaniiaǵa jiberip teksertkenbiz. Tester jaqsy jumys istep tur. Osy test boiynsha bizde koronavirýs infektsiiasy tabylmady, - dedi Eljan Birtanov.
12 naýryzda prezident Qasym-Jomart Toqaev Twitter-de "qoǵamdyq sharalardy ótkizýge tyiym salynady, azamattar azyq-túlik jáne taýarmen úzdiksiz qamtamasyz etiledi" dep jazdy.
Qazaqstanda resmi derek boiynsha, koronavirýs eshkimnen tabylmaǵan. Álemde koronavirýsty juqtyrǵandar sany 122 myńnan asty.
