Aýyl sharýashylyǵy ministrligi Qazaqstandaǵy kiikter sanyn atady, dep habarlaidy "Ult aqparat" vedomstvonyń baspasóz qyzmetine silteme jasap.
«2018 jyly kiikterdiń sany 215 100-di qurady. Jyl saiyn olardyń sany 41 paiyzǵa ósip keledi», - delingen Aýyl sharýashylyǵy ministrliginiń Facebook-tegi resmi paraqshasynda.
Ministrlikten habarlanyp otyrǵandai, kiikterdiń bes negizgi popýliatsiiasy bar: olardyń úsheýi - Qazaqstanda, bireýi - Reseide (Qalmaqiia), endi bireýi Mońǵoliiada tirshilik etedi. Qazaqstandaǵy popýliatsiialar - Betpaqdala, Oral jəne Ústirt kiikteri. Elimizde kiikterdiń taralý aýmaǵy on oblys territoriiasyn qamtidy. Janýarlardyń tirshilik etý aýqymy kórshiles Ózbekstan men Resei Federatsiiasynyń jerlerine de sozylǵan.
Sonymen birge, Aýyl sharýashylyǵy ministrligi 2015 jyly kiikterdiń jappai qyrylýynyń sebebin atady.
«2015 jyldyń 11 mamyry men 5 maýsymy aralyǵynda Qostanai, Aqtóbe, Aqmola oblystarynda Betpaqdala kiiginiń jappai qyrylýy tirkelgen bolatyn. Istiń mán-jaiyn anyqtaýǵa Bilim jáne ǵylym ministrliginiń ǵylymi uiymdary men mamandandyrylǵan zerthanalarynyń (Biologiialyq qaýipsizdik problemalary ǵylymi-zertteý institýty, Mikrobiologiia jáne virýsologiia ǵylymi-zertteý institýty, Zoologiia institýty), Energetika ministrliginiń (oblystyq ekologiia departamentteri) ókilderi jáne Koroldik veterinarlyq kolledjdiń (Angliia), Frankfýrt zoologiia qoǵamy (Germaniia), BUU Azyq-túlik jáne aýylsharýashylyq uiymynyń (FAO), Halyqaralyq Epizootikalyq biýrosy jáne Rosselhoznadzor (Resei) janýarlar densaýlyǵyn qorǵaý federaldy ortalyǵynyń sheteldik sarapshylary jumylǵan edi. QR BǴM Biologiialyq qaýipsizdik máseleleri ǵylymi-zertteý institýtynyń qorytyndysyna sáikes, Aqmola, Aqtóbe jáne Qostanai oblystarynda kiiktiń qyrylýyna pasterellez sebep bolǵan», - delingen habarlamada.
