Ashyq normativtik-quqyqtyq aktiler portalynda QR Tsifrlyq damý, innovatsiialar jáne aeroǵarysh ónerkásibi ministriniń Halyqqa qyzmet kórsetý ortalyqtarynyń jumys kestesine ózgeris engizýdi kózdegen buiryǵynyń jobasy jariialandy, dep habarlaidy QazAqparat.
Jańa ózgeristerde jumys kestesi kelesidei kórsetilgen: dúisenbiden bastap jumany qosa alǵanda, úzilissiz saǵat 9.00-den 18.00-ge deiin; kezekshi bólimder dúisenbiden bastap jumany qosa alǵanda, saǵat 9.00-den 20.00-ge deiin jáne senbi kúni saǵat 9.00-den 13.00-ge deiin.
Qajet bolǵan jaǵdaida ótinishterdi qabyldaý jáne memlekettik kórsetiletin qyzmetterdiń daiyn nátijelerin berý: dúisenbiden bastap jumany qosa alǵanda, saǵat 18.00-den 20.00-ge deiin jáne senbi kúni saǵat 9.00-den 13.00-ge deiin júzege asyrylady.
Vedomstvonyń jumys kestesin qysqartý jáne HQKO-nyń kezekshi bólimderin engizýdiń arqasynda biýdjet únemdeletindigi atap ótiledi.
Ministrlik málimetinshe, 2021 jylǵy qańtar aiyndaǵy jaǵdaiǵa sáikes Qazaqstan Respýblikasy boiynsha halyqqa qyzmet kórsetý bólimderi qyzmetkerleriniń shtat sany 8 967 adam boldy. Búgingi tańda operatorlardyń shtattyq sany – 8 379,5 birlikti, al naqty sany 7 062,5 birlikti quraidy.
«Memlekettik korporatsiia qyzmetkerleriniń sanyn 30 paiyzǵa qysqartý josparlanyp otyr. Osyǵan bailanysty, eki aýysymdy jumys kestesine (saǵat 9:00-den 18:00-ge deiin jáne saǵat 11.00-den 20.00-ge deiin) kóshýdi orynsyz dep sanaimyz. Is júzinde 9:00-den 18:00-ge deiin jumys kestesine aýysý oń dinamikany kórsetip otyr. Atalǵan ózgeris qyzmetkerlerdi bir aýysymdyq jumys kestesine aýystyrýǵa jáne kesimdi jalaqy tóleý júiesin engizýge, nátijesinde qyzmetkerlerdiń joǵary jumys qabilettiligin qamtamasyz etýge múmkindik beredi», - dep atap ótedi vedomstvodan.
