Keshe, 13 qazanda Qazaqstanda 1985 adamnyń koronavirýs testi oń shyqty. Bul aldyńǵy kúnmen salystyrǵanda 268 adamǵa kóp. Sársenbi kúni 1895 adam Covid-ten aiyqty.
Bir kúnde tirkelgen naýqastardyń úshten bir bóligi Almaty men Nur-Sultan qalalaryna keledi. Ótken táýlikte Almatyda – 350, Nur-Sultanda 270 adamnan koronavirýs anyqtalǵan. Qaraǵandy oblysynda – 163, Pavlodar oblysynda – 154, Almaty oblysynda – 142, Shyǵys Qazaqstan oblysynda – 135, Aqmola oblysynda 120 adamnyń koronavirýs testi oń shyqqan. Eń tómen kórsetkish Mańǵystaý oblysynda(7) tirkelgen.
Indet bastalǵaly beri Qazaqstanda 910 myń adamnyń koronavirýs testi oń shyqqan. 852 myńy aiyqqan. 11 644-i qaitys bolǵan. 12 qazanda koronavirýstan 31 naýqas kóz jumǵan.
Pnevmoniianyń koronavirýsqa uqsas túrin Qazaqstan biligi halyqaralyq uiymdardyń qysymynyń nátijesinde 2020 jyldyń 1 tamyzynan bastap esepke ala bastaǵan.
Sodan beri resmi málimet boiynsha, 77 myńnan astam adam koronavirýs pnevmoniiasyna shaldyqqan. 12 qazanda bul diagnoz taǵy 99 adamǵa qoiyldy. 2020 jyldyń 1 tamyzynan beri "kovidtektes pnevmoniia" 4939 naýqas ólimine sebepshi bolǵan. 8-i eki kún buryn kóz jumǵan.
Odan bólek, koronavirýs juqtyrǵany rastalǵan 3123 adamnyń ólimi koronavirýstan qaitys bolǵandardyń statistikasyna kirmei qalǵan.
Qazir Nur-Sultan, Almaty qalalary, Pavdodar, Aqmola, Soltústik Qazaqstan oblystary "qyzyl aimaqta" tur. "Jasyl aimaqta" Shymkent qalasy, Túrkistan, Jambyl, Atyraý, Aqtóbe, Qyzylorda oblystary tur. Qalǵany "sary aimaqta".
Qazir respýblika boiynsha 53 myńǵa jýyq naýqas koronavirýstan emdelip jatyr. 9,1 myń naýqas statsionarda jatyr.
Qazir 7 million adam koronavirýsqa qarsy vaktsinanyń tolyq dozasyn alǵan. 900 myń adam ekinshi dozasyn kútip otyr.
Qazir Qazaqstanda 18 ben 65 jas aralyǵyndaǵy adamdarǵa reseilik "Spýtnik V" (qazir ony Qaraǵandyda óndiredi), qazaqstandyq QazVac, qytailyq Sinopharm kompaniiasynyń BAÁ-de óndirilgen Hayat-Vax pen Qytaida óndirilgen Vero Cell ekpesi, sonymen birge taǵy bir qytailyq Sinovac kompaniiasynyń CoronaVac ekpesi salynyp jatyr.
Bir kún buryn densaýlyq saqtaý ministri Aleksei Tsoi elde revaktsinatsiia qarashanyń sońynda bastalady, elde koronavirýstyń úshinshi dozasyn biyl alýy tiis 600 myń adam bar dep málimdegen.
