QR Densaýlyq saqtaý vitse-ministri – Bas memlekettik sanitar dáriger Erlan Qiiasov el turǵyndaryna úndeý jasap, karantindik sharalar kúsheitilýi múmkin ekenin málimdedi, dep habarlaidy "Ult aqparat".
Onyń aitýynsha, sońǵy aida Qazaqstannyń birneshe óńirinde COVID-19 naýqastary kóbeidi. QR «jasyl» aimaqtan «sary» aimaqqa aýysty.
«Sońǵy aida Atyraý oblysynda naýqastardyń 3,7 ese ósýi baiqalady. Almaty obylsynda – 1,8 ese, Qaraǵandy oblysy men Almaty qalasynda – 1,5 ese ósken. Mańǵystaý oblysynda – naýqastar sany 81-den 315 jaǵdaiǵa deiin, Túrkistan oblysynda – 102-den 256 jaǵdaiǵa deiin, Shymkent qalasynda 150-den 195 jaǵdaiǵa deiin, Qyzylorda oblysynda 48-den 135 jaǵdaiǵa deiin ósý baiqalady. Qalyptasqan epidemiologiialyq jaǵdai eskere otyryp, búgingi kúni halyqtyń kóp jinalýyn azaitýǵa baǵyttalǵan karantindik sharalardy kúsheitý qarastyrylyp jatyr», - dedi Erlan Qiiasov Ortalyq kommýnikatsiialar qyzmetinde ótken brifingte.
Sonymen birge, bas sanitarlyq dáriger qazaqstandyqtarǵa úndeý jasady.
«Azamattardyń saqtyq sharalaryna nemquraily qaraýynyń saldarynan elimizde epidemiologiialyq jaǵdai nasharlady. Sondyqtan, qonaqqa barmaýǵa jáne qonaqqa shaqyrmaýǵa, jeke gigiena jáne respiratorlyq gigiena erejelerin saqtaýǵa, qoǵamdyq oryndarda áleýmettik araqashyqtyqty saqtaýǵa, meditsinalyq maska taǵýǵa, antiseptikter qoldanýǵa shaqyramyn», - dedi Erlan Qiiasov.
