Foto: pexels.com
Eńbek jáne halyqty áleýmettik qorǵaý ministrligi 1 qazan Halyqaralyq qarttar kúnine orai respýblikadaǵy qarttarǵa qatysty derekter men olardy qoldaý sharalary týraly málimet jariialady, dep habarlaidy Ult.kz.
Málimet boiynsha, elde 2,4 millionnan astam zeinetker turady.
Elimizde bazalyq zeinetaqynyń mólsherin kezeń-kezeńimen arttyrý jalǵasyp jatyr. Osylaisha 2024 jylǵy 1 qańtardan bastap onyń eń tómengi mólsheri eń tómen kúnkóris deńgeiiniń 60%-ynan 65%-yna deiin, al eń joǵary mólsheri 100%-ynan 105%-yna deiin artty.
Respýblikada 92 Belsendi uzaq ómir súrý ortalyǵy ashylyp, jumys isteýde. Ortalyqtardyń jumysyna isteýine jergilikti biýdjetterden bólingen qarajattyń jalpy somasy 2024 jylǵa 5,9 mlrd teńgege jetken.
Sondai-aq 1 qazanda elimizde Qarttar kúnine orailastyrylǵan ailyq bastalady eken. Oblystardyń, qalalar men aýdandardyń ákimderi, kásiporyndar men uiymdardyń basshylary aǵa býyn azamattaryn áleýmettik qoldaý jónindegi is-sharalardy, eńbek ujymdarynda kezdesýlerdi, ambýlatoriialyq-emhanalyq uiymdarda Ashyq esik kúnderin jáne basqalardy ótkizedi.
"Sonymen qatar Qarttar kúnine orai Astana qalasynda, Aqmola (eń tómengi zeinetaqy alýshylarǵa), Qaraǵandy (75 jastan asqan azamattarǵa), Pavlodar (eń tómengi zeinetaqy alýshylarǵa jáne 80 jastan asqan azamattarǵa), Shyǵys Qazaqstan (90 jastan asqan azamattarǵa), Mańǵystaý (70 jastan asqan azamattarǵa 25 qazanǵa qarsy), Túrkistan (jalǵyzbasty zeinetkerlerge jáne 100 jastan asqan azamattarǵa) oblystarynda, sondai-aq Ulytaý oblysynda (70 jastan asqan azamattarǵa jáne múgedektigi bar adamdarǵa) 235,8 myń adamdy qamti otyryp, jalpy somasy 2,7 mlrd teńgege birjolǵy materialdyq kómek kórsetiletin bolady", - delingen habarda
Biyl jergilikti biýdjetterdiń múmkindikterin eskere otyryp jáne biznestiń áleýmettik jaýapkershiligi aiasynda qart azamattardy áleýmettik qoldaýǵa 12,4 mlrd teńgeden astam qarajat baǵyttaldy (onyń ishinde jergilikti biýdjetterden – 11,8 mlrd teńge, tartylǵan qarajat esebinen – 0,6 mlrd teńge), onyń ishinde:
- - azyq-túlik jiyntyǵyn usynýǵa – 229,4 mln teńge (26,5 myń adam);
- - jeńildikpen dári-dármekpen qamtamasyz etýge – 2 mlrd 318 mln teńge (62,2 myń adam);
- - tis protezdeýge – 515,5 mln teńge (3,9 myń adam);
- - sanatoriilik-kýrorttyq emdeýdi usynýǵa – 3 mlrd 448 mln teńge (23,3 myń adam);
- - turǵyn úidi jóndeýge – 31,4 mln teńge (189 adam);
- - otynmen qamtamasyz etýge – 75,6 mln teńge (2,6 myń adam);
- - jalpy paidalanýdaǵy kólikte jeńildikpen jol júrýdi usynýǵa – 5 mlrd 179 mln teńge (409,9 myń adam);
- - kómektiń basqa túrlerine – 638,4 mln teńge (81,5 myń adam).
Aita keteiik, Halyqaralyq qarttar kúni 1990 jyly 14 jeltoqsanda Birikken Ulttar Uiymy Bas Assambleiasynyń 45-sessiiasynda jariialanǵan.
Ony ótkizýdiń basty maqsaty – qariialardyń memleket pen qoǵam aldyndaǵy eńbegin qurmetteý jáne moiyndaý, sondai-aq olardyń problemalary men qajettilikterine nazar aýdarý, ómir súrý sapasyn arttyrý qajettiligi, olarǵa jalpyǵa birdei qamqorlyq kórsetý.
