Qazaqstanda kádege jaratý tólemderin jinaityn jeke memlekettik operator qurylady. Bul týraly búgin Úkimet otyrysynda Ekologiia, geologiia jáne tabiǵi resýrstar ministri Serikqali Brekeshev málim etti, dep habarlaidy "QazAqparat" HAA.
«Kádege jaratý tólemderine qatysty Memleket basshysy bergen tapsyrmalaryn oryndaý úshin kelesidei jumystar júzege asyrylady. «Operator ROP» JShS QR Ekologiia kodeksiniń 387-babyna sáikes 2015 jylǵy 30 jeltoqsandaǵy QR Úkimetiniń qaýlysymen quryldy. 2016 jyldan búgingi kúnge deiingi kezeńde kádege jaratý tólemi túrinde túsken qarajat kólemi 691,9 mlrd teńgeni qurady. Alynǵan qarajat QR qoldanystaǵy zańnamasyna sáikes jumsaldy. Atap aitqanda, otandyq avtokólik óndirýshilerge 338,9 mlrd teńge mólsherinde kádege jaratý túrindegi buryn tólegen qarajattary qaitaryldy. Ekologiialyq máselelerdi sheshýge 102 mlrd, salyqtarǵa 49,1 mlrd teńge jumsaldy. Búgingi tańda qarajat qaldyǵy ekinshi deńgeili bankterde 220,6 mlrd teńgeni quraidy», - dedi ol.
Serikqali Brekeshev Memleket basshysynyń tapsyrmasyna orai ministrlik biznestiń, qoǵamnyń jáne múddeli memlekettik organdardyń qatysýymen birqatar máseleni pysyqtaityndyǵyn atap ótti.
«Birinshi - jeke memlekettik operator nemese Ónerkásipti damytý qorynyń bazasynda operator qurý. Ekinshi – kádege jaratý koeffitsietterin qaita qaraý. Úshinshi – kádege jaratý alymy esebinen otandyq kólik quraldary men aýyl sharýashylyǵy tehnikalaryn satyp alýshylarǵa vaýcherler berý», - dedi ministr.
