Qazaqstanda it aiqasyn ótkizýge zańnamalyq túrde tyiym salynbaq. Bul týraly QR Ekologiia, geologiia jáne tabiǵi resýrstar vitse-ministri Áliia Shalabekova Májiliste «Janýarlarǵa jaýapkershilikpen qaraý týraly» zań jobasyn tanystyrý kezinde aitty, dep habarlaidy QazAqparat.
«Búgin nazarlaryńyzǵa usynylǵan zań jobasy janýarlarǵa qatysty keleńsiz kórinisterge tosqaýyl qoiady. Mundai kórinisterge, atap aitqanda, it aiqastyrý, anesteziiasyz veterinariialyq operatsiialar júrgizý, janýarlardy óltirgeni úshin jazasyz qalý, janýarlardy ash ustaý jáne olarǵa ýaqytynda kómek kórsetpeý, qatigezdikpen aýlaý, jeýge jáne ónim alýǵa arnalmaǵan janýarlardyń eti men maiyn paidalaný jatady», - dedi vitse-ministr.
Onyń aitýynsha, zań jobasynyń erejelerin iske asyrý úshin qoldanystaǵy zańnamaǵa, atap aitqanda Qylmystyq kodekske, Ákimshilik quqyq buzýshylyq týraly kodekske, Jergilikti memlekettik basqarý jáne ózin-ózi basqarý týraly, Veterinariia týraly, Janýarlar dúniesin qorǵaý, ósimin molaitý jáne paidalaný týraly zańdarǵa ózgerister men tolyqtyrýlar engizý qajet.
«Janýarlarǵa jaýapkershilikpen qaraý týraly» zań jobasyn qabyldaý Qazaqstannyń progressivti, zamanaýi memleket retindegi imidjin nyǵaitady, barlyq tirshilik ielerine adamgershilik pen izgi qarym-qatynasty qalyptastyrýǵa, úi janýarlaryna qatysty turmystyq zorlyq-zombylyqtyń aldyn alýǵa múmkindik beredi dep sanaimyz», - dep túiindedi vitse-ministr.
