Qazaqstanda innovatsiialyq granttar boiynsha ekinshi konkýrsqa ótinimder qabyldaý bastaldy. Bul týraly óziniń Facebook paraqshasynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin jazdy, dep habarlaidy "Ult aqparat".
«Biyl biz 1-12 aqpan aralyǵynda innovatsiialyq granttar berý boiynsha pilottyq baiqaý ótkizgen bolatynbyz. Barlyǵy 661 ótinim túsip, jiti suryptaý men qazylardyń tańdaýynan keiin sońǵy kezeńge tek bes úmitker ǵana ótti: «ForumVR», InTech-Forecast «JQK nysandary úshin IT-baǵdarlama jasaý», «COWMAS – IQM týraly málimetterdi baqylaý jáne saraptaý», «Smart Terminal» jobasy, «Faceplate». Olarǵa tehnologiialardy kommertsiialandyrýǵa arnalǵan innovatsiialyq granttar berý týraly sharttar jasaldy», - dep jazdy ministr.
Pilottyq konkýrstyń nátijesi boiynsha sarapshylar men grantqa ie bolǵan kisilerdiń oi-pikirlerin eskere otyryp, áriptester baiqaý sharttaryna ózgerister engizdi. Endi baiqaýǵa qatysam deýshilerde akseleratsiialyq baǵdarlamalardan sátti ótkendigin dáleldeitin sertifikat bolýy tiis. Onyń ústine ekinshi jáne úshinshi kezeńdegi irikteýge qatysý úshin aldymen birinshi satydan ótý shart.
Sondai-aq qarjylandyrý sharttary da ózgerdi. Birinshi satyny iske asyrýǵa arnalǵan innovatsiialyq grant somasy 20 mln teńgeden, al ekinshi jáne úshinshi satylar úshin 80 mln. teńgeden aspaidy.
«Keshe innovatsiialyq granttar berý boiynsha ekinshi konkýrs jariialandy. Ótinimder 2021 jylǵy 10-23 tamyz aralyǵynda https://qazinn.kz/ portaly arqyly qabyldanady. Barlyq suraqtar boiynsha tikelei Ilias Ospanovqa nemese Community QazInnovations keńes berý Telegram-arnasyna jaza alasyzdar. Barlyq jasampaz jandardy osy konkýrsqa qatysýǵa shaqyramyn, bul – startaptaryńyzdy júzege asyryp, damytý úshin óte jaqsy múmkindik. Iske sát!»,-delingen jazbada.
