Foto: QR DSM
Almaty qalasynda Memleket basshysynyń tapsyrmasymen salynǵan strategiialyq mańyzdy nysan – Infektsiialyq aýrýlardyń ulttyq ǵylymi ortalyǵynyń saltanatty ashylý rásimi ótti, dep habarlaidy Ult.kz.
Is-sharaǵa Qazaqstan Respýblikasy Premer-ministriniń orynbasary – Mádeniet jáne aqparat ministri Aida Balaeva, Qazaqstan Respýblikasynyń Densaýlyq saqtaý ministri Aqmaral Álnazarova, sondai-aq Almaty qalasynyń ákimi Darhan Satybaldy qatysty.
Ortalyq COVID-19 pandemiiasy kezindegi máselelerden sabaq ala otyryp, densaýlyq saqtaý júiesindegi daiyndyq deńgeiin arttyrý, ǵylymi áleýetti damytý, tsifrlyq sheshimderdi engizý jáne kadrlardy daiyndaý maqsatynda boi kóterdi. 350 tósek-orynǵa eseptelgen jańa ortalyq elimizdiń túkpir-túkpirinen týberkýlezben aýyratyn 2,5 myń naýqasty jyl saiyn emdeýge jáne diagnostikalyq kómek kórsetýge yqpal etedi.
«Bul ortalyq Prezident tapsyrmasymen ult densaýlyǵyn nyǵaitý jáne biologiialyq qaýipsizdikti qamtamasyz etý maqsatynda boi kóterdi. Búginde bul Ortalyqta ǵylymi zertteýler, ozyq tehnologiia jáne bolashaq mamandardy tárbieleý baǵyttary ózara sabaqtasyp, birtutas júiege ainalyp otyr. Infektsiialyq aýrýlardyń ulttyq ǵylymi ortalyǵy óskeleń urpaqtyń densaýlyǵyn saqtaýǵa, ulttyq qaýipsizdikti nyǵaitýǵa jáne otandyq meditsinalyq ǵylymdy damytýǵa zor úles qosady dep senemin», – dedi Aida Balaeva.
Premer-ministrdiń orynbasary Memleket basshysynyń tapsyrmasyna sáikes elimizde densaýlyq saqtaý nysandarymen qatar áleýmettik infraqurylym da qarqyndy damyp jatqanyn atap ótti.
«Keiingi eki jylda elde 695 jańa meditsinalyq nysan, 614 myń orynǵa arnalǵan 419 jańa mektep salyndy. Bul 19 apatty mektepti joiýǵa, 58 mekteptegi úsh aýysymdy oqytý máselesin sheshýge jáne 190 mekteptegi oqýshy oryndarynyń tapshylyǵyn azaitýǵa múmkindik berdi. Sonymen qatar, 237 sport nysany salyndy, onyń ishinde 69-y qalalarda, 168-i aýyldyq jerlerde ornalasqan. 2025 jyly 61 mádeniet nysanynyń qurylysy aiaqtaldy. Óńirlerde 251 nysanda jóndeý jumystary júrgizilip jatyr. Bul ózgerister, eń aldymen, halyqtyń ómir sapasyn arttyrýǵa, áleýmettik qorǵaýdy nyǵaitýǵa baǵyttalǵan», – dep atap ótti A.Balaeva.
Is-shara barysynda Ortalyqtyń bólimshelerine ekskýrsiia uiymdastyrylyp, mekemeniń infraqurylymy men jabdyqtalýy tanystyryldy. Sonymen qatar mekeme ujymymen de kezdesý ótti.
Aita keteiik, Infektsiialyq aýrýlardyń ulttyq ǵylymi ortalyǵy qysqa merzimde salynǵan. Bul ortalyqta klinikalyq kómek kórsetý, ǵylymi jumys júrgizý, bilim berý, tsifrlyq tehnologiialardy paidalaný sekildi múmkindikter bar. Ortalyq balalar men júkti áielderge de meditsinalyq kómek kórsetedi. Tótenshe jaǵdailar kezinde Ortalyq jedel túrde 500 tósek-orynǵa deiin keńeitilýi múmkin.
IAUǴO – diagnostika men emdeýden bastap, infektsiialyq jáne parazittik aýrýlarǵa, onyń ishinde dárige tózimdi týberkýlez túrlerine qatysty kúrdeli zerthanalyq zertteýler júrgize alatyn tolyqqandy mekeme. Ortalyq infektsiialyq qaýip-qaterge ulttyq deńgeide mán beretin, ǵylymi jańalyqtar men infektsiialyq aýrýlarmen jumys isteitin mamandardy kásibi daiarlaityn bazaǵa ainalmaq.
