Elimizde «Atameken» Ulttyq kásipkerler palatasy janynan importty almastyrý jónindegi keńes qurylady, dep habarlaidy QazAqparat.
«Búginde ekonomikamyz ben otandyq kásiporyndardyń deńgeiin qalai kóteremiz degen suraq tóńireginde birshama pikirtalas bolyp jatyr. Qoǵamda bilikti oilandyryp otyrǵan ózekti máseleler bar. Keiingi jyldary elde jalpy biýdjettik saladaǵy muǵalimder, dárigerlerdiń ailyǵyn kóterý máselesi qaralýda. Bul – halyqtyń ál-aýqatyn jaqsartý baǵytyndaǵy igi bastamalar. Biraq, ol sanattaǵy adamdar – biýdjet salasynda jumys isteitin azamattardyń 20 paiyzyn ǵana quraidy. Al qalǵan azamattar shaǵyn nemese úlken kásiporynda eńbek etedi. Sondyqtan, bizdiń maqsatymyz – óndiristi kóterý arqyly sonda isteitin azamattardyń ál-aýqatyn jaqsartý», - dedi «Atameken» Ulttyq kásipkerler palatasynyń basqarma tóraǵasy Abylai Myrzahmetov OKQ-da ótken baspasóz máslihatynda.
Onyń aitýynsha, qazirgi ýaqytta AQSh óndiristiń bárin ózi júrgizýge barlyq jaǵdai jasap jatyr. Saýdanyń tizginin ustaǵan alyp memleketter protektsiialyq saiasat júrgizip, otandyq óndirisin qoldap, qorǵaýǵa baryn salýda.
«Biz de otandyq kásiporyn men otandyq óndiriske degen kózqarasymyzdy túbegeili ózgertýimiz kerek. Birinshiden, negizgi tabysymyzdy shikizat salasynan taýyp otyrmyz. Al durysy shikizat emes, óńdeý salasyn damytý kerek. Bizdiń shikizattyq emes óńdeý salasynyń jalpy ishki ónimdegi úlesi 11,5 paiyzdan aspaidy. Shikizat emes saladaǵy mekemeler qazir óziniń múmkinshiligin 45-50 paiyzdyq deńgeide ǵana paidalanýda. Iaǵni, suranystyń azdyǵynan bizdiń mekemeler aiaqqa nyq tura almai, modernizatsiia júrgizý, tehnologiialyq jáne jumysshylardyń áleýmettik máselesin sheshý jumysyn oryndai almai otyr», - dedi ol.
Osy sebepti keiingi eki jarym jylda «Atameken» UKP Úkimetpen osy máseleni tereń taldap, byltyr jeltoqsanda importty almastyrý boiynsha vedomtsvoaralyq komissiia qurylǵan.
«Kásipkerlerimiz bas biriktirip, ekonomikamyzdy kóterýge atsalysaiyq dep otyr. Olar «Atamekenniń» basshylyǵyna importty almastyrý jáne otandyq kásiporyndardy qoldaý jónindegi keńesti qurý týraly úndeý tastady. Sondyqtan, osy úndeýge rizashylyǵymdy bildirip, qoldaimyn. Aqyldasa kele osyndai keńesti qurý jóninde sheshim qabyldadyq», - dedi ol.
Jańadan qurylatyn keńesti «Alageum Electric» kompaniialar toby baqylaý keńesiniń tóraǵasy Saidýlla Qojabaev basqarady.
