Qazaqstanda ǵalymdar men zertteýshilerdiń biryńǵai bazasy qurylýy múmkin. «QR keibir zańnamalyq aktilerine ǵylym máseleleri boiynsha ózgerister men tolyqtyrýlar engizý týraly» zań jobasyna májilismender osyndai norma engizip otyr, dep habarlaidy QazAqparat.
«Qazaqstanda zertteýshiler men ǵalymdardyń biryńǵai bazasy qurylýy kerek dep esepteimiz. Zań jobasyna bul norma da engizildi. Qazirgi tańda biz ulttyq ǵylymi keńestiń sapaly quramyn jasaqtaý máselesin kóterip jatyrmyz. Alaida ol keńeske eń myqty ǵalymdardy tartyp, ol sarapshy-ǵalymdar eń myqty jobalardy iriktei alýy úshin bul baza qurylýy kerek dep bilemiz. Iaǵni bizge eldegi ǵalymdardyń reitingin bilip otyrǵan abzal. Bizde buǵan deiin daý týǵyzar jaǵdailar kezdesken. Atap aitqanda, ulttyq ǵylymi keńestiń quramyndaǵy ǵalymnyń ǵylymdaǵy jetistigi konkýrsqa ótinim bergen ǵalymnyń jetistiginen tómen bolǵan jailar da boldy. Sol úshin keńeske moiyndalǵan laiyqty sarapshylar kirýi tiis», - dedi Parlament Májilisiniń depýtaty Jámilá Nurmanbetova vedomstvoaralyq komissiia otyrysynan keiin tilshilerge.
Depýtattyń aitýynsha, Bilim jáne ǵylym ministrligi zań jobasynyń bul normasyn qoldamai, atalmysh bazany qurý qosymsha shyǵyndy qajet etetinin alǵa tartqan.
«Biraq menińshe, Ulttyq ǵylymi saraptama ortalyǵy arqyly bul bazany qurý sonshalyqty kúrdeli emes. Biryńǵai baza bolmaǵandyqtan ǵalymdarymyzdyń qansha ekenin de bilmeimiz», - deidi Jámilá Nurmanbetova.
Eske sala ketsek, búgin Ádilet ministrligindegi vedomstvoaralyq komissiia otyrysynda «QR keibir zańnamalyq aktilerine ǵylym máseleleri boiynsha ózgerister men tolyqtyrýlar engizý týraly» zań jobasy qaralǵan bolatyn. Bilim jáne ǵylym ministrligi Májilis depýtattary usynǵan 42 normanyń 29-yn qoldaǵan. 11 normany qoldamaǵanymen, aldaǵy otyrystarda zań jobasy keńinen talqylanbaq.
