Qazaqstanda et jeýden jarys ótti, - dep habarlaidy Tengrinews.kz. Baiqaý Ulytaýda "Kókmaisa-2018" birinshi etnofestivali aiasynda boldy.
Jarysqa bes adam qatysty, olar elimizdiń ár óńirinen - Mańǵystaý, Shymkent, Jezqazǵan jáne Ulytaý. Qatysýshylar bes minýttyń ishinde tabaqtaǵy qoidyń etin taýysýǵa mindetteldi.
Jarystyń jeńimpazy - 25 jastaǵy jezqazǵandyq jigit Bekzat Jarmaǵambet. Birinshi oryny úshin ol 30 myń teńge, ekinshi oryndaǵy ulytaýlyq qatysýshy 20 myń teńge aldy, al úshinshi oryn shymkenttik qonaqqa buiyrdy.
Osydan keiin qymyz ishýden jarys ótti. Jarystyń bul túrinde birinshi oryndy Qaraǵandy oblysy Ulytaý aýdanynyń turǵyny Almas Bimaǵambet ielendi. Ol toqtamai 4,3 litr qymyz ishti.
"Kókmaisa-2018" etnofestivali tuńǵysh ret Ulytaýda 6-9 mamyr aralyǵynda ótti. Tanymal kásipker Marǵulan Seisembaidyń bastamasyn qoldaǵan jergilikti ákimdiktiń qoldaýymen ótken festivalge Qazaqstannyń ár óńirinen kelgen 1500-2000 jýyq adam qatysyp, úsh-tórt kún boiy kóshpendi halyq ǵurpymen tanysyp, ystyq sýyǵyn bastan keshirdi. Osy sharaǵa qonaq bolyp kelgender qatarynda Murat Ábenov, Jániia Áýbákirova, Muhtar Taijan syndy tanymal adamdar boldy. Festivaldiń birinshi kúninde kelgen qonaqtar jergilikti halyqtyń tikken kiiz úilerinde, ózderimen alyp kelgen shatyrlarynda, avtokemperlerde qonystandy.
Kórmege qoiylǵan qolóner sheberleriniń týyndylarymen tanysqan jurt, qazaqtyń jat bolyp bara jatqan ulttyq oiyndaryn (Meshkeiler jarysy, Qymyz ishý jarysy, Qatyn kúres) tamashalap qana qoimai, ózderi de qatysyp, júldeli oryn úshin talasty. Etnofestival qonaqtary Ulytaý jerindegi Er Edige bi men Toqtamys hannyń jerlengen taý shyńyna shyǵyp, Alashahan, Joshyhan jáne Dombaýyl kesenelerin aralady.
