Foto: Qarjy monitoringi agenttigi
Qarjylyq monitoring agenttigi 55 telegram-arnanyń zańsyz qyzmetin toqtatty. Osylaisha 50 myńnan astam adamdy arbaǵan, jalpy ainalymy 48 milliard teńge esirtki biznesine tosqaýyl qoiyldy.
Qarjy monitoringi agenttiginiń málimetinshe, jyl basynan beri eldiń quqyq qorǵaý organdarymen (ETTQ, UQK, BP, IIM) esirtkiniń zańsyz ainalymyna bailanysty 60 qylmystyq is qozǵaldy. Sonyń jartysy kontrabanda faktileri. Onlain narkoshoptarǵa qatysty taǵy 29 material boiynsha tekserý is-sharalary júrgizildi.
"100-den astam adam, onyń ishinde UQT 12 múshesi ustaldy. Ainalymnan shamamen 100 kg aýyr esirtki – kokain, ketamin, mefedron jáne marihýana, sondai-aq olardy jasaý úshin 1 tonnadan astam prekýrsorlar tárkilendi. Qylmystardyń áleýetti qatysýshylary bolyp tabylatyn 30 myńǵa jýyq "droptardyń" banktik kartalary buǵattalǵan. Shymkentte Qazaqstandaǵy eń iri mefedron óndirý jáne taratý arnasy toqtatyldy. Esirtki laboratoriiasy qurylyp, onda sintetikalyq esirtki óndirýge arnalǵan 1 tonnadan astam qyshqyl tárkilendi", –dedi agenttik.
Agenttik onyń óndiristik qýaty ai saiyn 50 myń doza esirtki óndirýge múmkindik beretinin atap ótti. Halyqaralyq yntymaqtastyq aiasynda QMA analitikalyq málimetter negizinde TMD keńistiginde esirtki taratqan transulttyq internet-dúkenderdi joiý boiynsha Qazaqstan, Belarýs jáne Resei qarjy barlaýshylarynyń qatysýymen arnaiy operatsiia júrgizildi.
"Úsh eldiń aýmaǵynda úsh aýqymdy esirtki dúkeni jabyldy, 35 narkodiler ustaldy, 1 tonnadan astam psihotroptyq zattar jáne klientterge satýǵa daiyn 3,5 myń dozaǵa jýyq sintetikalyq esirtki tárkilendi. Halyqaralyq "esirtki satýshylardyń" jalpy tabysy shamamen 30 million AQSh dollaryna teń, onyń 12 milliony kriptovaliýtada shyǵaryldy. QMA bastamasy boiynsha ulttyq banktiń jáne QNRDA qaýlylaryna ózgerister engizildi, bir klientke birneshe bank kartasyn shyǵarý boiynsha shekteýler belgilendi jáne onlain rejimde olardyń monitoringi qamtamasyz etildi", – delingen agenttik habarlamasynda.
Rezident emes jáne kámeletke tolmaǵandarǵa tólem kartochkalaryn berý kezinde qosymsha baqylaý jáne shekteý sharalary belgilendi.
Aita keteiik, jańa klientti tirkeý kezinde mindetti biometriialyq sáikestendirýdi júrgize otyryp, tólem kartalaryn shyǵarý boiynsha bankterdiń ishki baqylaý sharalary kúsheitildi. Esirtkiniń taralý belgileri men kriteriileri barlyq bankterge jiberildi. Bul esirtki saýdasynyń faktilerin odan ári anyqtaýǵa múmkindik beredi. Atalǵan normalardyń qoldanylý merziminen bastap birneshe karta ustaýshylar sany 9,5 myńnan 3,6 myń klientke deiin qysqardy, 1,5 myń klientke qashyqtyqtan qyzmet kórsetýge qoljetimdilik jabyldy.
