Qazaqstanda kem degende 10-12 mln adamdy vaktsinalaý qajet. Bul pikirdi meditsina ǵylymdarynyń doktory, immýnolog, professor, QR Densaýlyq saqtaý ministrligi Meditsinalyq jáne farmatsevtikalyq baqylaý komiteti dárilik zattar men meditsina buiymdaryn saraptaý ortalyǵynyń sarapshysy Pavel Deriabin aitty, dep habarlaidy QazAqparat.
«Biz áli vaktsinalaýdyń bas jaǵynda turmyz. Vaktsinatsiiany jedeldetý qajet, óitkeni Qazaqstan úshin ekpe alǵan bir million adamnyń sany óte az. Eger Izraildiń tájiribesin alsaq, onda qazir halyqtyń 65%-dan astamy egildi. Osyndai jappai vaktsinatsiiany júrgizý arqyly olar shekteýlerdi alyp jatyr. Ol jaqta is júzinde Covid-ten adam qaitys bolyp jatqan joq. Sondyqtan da biz osyndai kórsetkishterge umtylýymyz kerek. Qazaqstanda 18 million halyqtyń baryn eskersek, eń kemi 10-12 million adam infektsiianyń taralýyna jol bermeitin osy immýndyq qabatty alý úshin ekpe saldyrýy tiis. Ujymdyq immýnitet qalai qadaǵalanady? Ol tek bir naqty indikatormen – vaktsina alǵandardyń sanymen ǵana basqarylady. Barlyq basqa kórsetkishter ujymdyq immýnitettiń mánin kórsetpeidi», - dedi dáriger onlain dáriste.
Onyń pikirinshe, jappai vaktsinalaýdy ásirese úlken qalalarda múmkindiginshe tez júrgizý kerek.
Sonymen birge, zertteýshi vaktsinadan buryn jáne vaktsinadan keiin koronavirýsqa antidenelerdiń bar-joǵyn zertteý qajet emestigin aitty, óitkeni immýnitet tek antidenelermen ǵana qalyptaspaidy.
«Vaktsinalaýdan keiin «jady jasýshalary» paida bolady, olar belgili bir antideneler anyqtalmasa da, deneniń virýstan qorǵalýyna yqpal etedi. Sonymen qatar, koronavirýsqa qarsy antidenelerdiń barlyǵynda birdei qorǵanys qasietteri bolmaidy. Qorǵaýdy virýstyń jasýshalarǵa enýin tejeitin antideneler ǵana qamtamasyz etedi, bul «S aqýyzy» dep atalatyn antideneler, sonyń arqasynda virýs jasýsha retseptorlaryna qosylady. Bul antigen birqatar vaktsinalar jasaýda qoldanylady jáne naqty vaktsinalaýdan keiin paida bolatyn antideneler deneni infektsiiadan qorǵaidy», - deidi P. Deriabin.
