Qazaqstanda diplomnyń shynaiylyǵyn tekseretin qyzmet iske qosylady. Bul týraly QR Tsifrlyq damý, innovatsiialar jáne aeroǵaryshtyq damý ministri Asqar Jumaǵaliev málimdedi, dep habarlaidy "Ult aqparat".
«Sońǵy jazbalaryma birqatar qyzyqty pikirler men usynystar jazylǵan eken. Sonyń birnesheýine jeke-jeke toqtalsam deimin. Jumys berýshiniń diplomnyń shynaiylyǵyn olain tekserýi úshin diplomdardy tsifrlandyrý usynyldy. Bul baǵytta jumys júrgizilip jatyr. Bilim ministrligi qazir diplomdardyń derekter bazasyn tolyqtyryp jatyr. Jyl sońyna deiin diplomnyń shynaiylyǵyn tekseretin servisti iske qosý josparlanǵan», - dep jazdy ministr Facebook jelisinde.
Ministrdiń aitýynsha, turǵyndar aýrýhana qaǵazyn elektrondy formatqa aýystyryp, dekrettik tólemderdiń proaktivti kórsetilýin usynǵan.
«Bul másele de vedomstvoaralyq komissiia otyrystarynda kóterilgen. Júkti áielder HQO-ǵa kelip áýre bolmaýy úshin bosanýǵa deiingi jáne dekrettik tólemderdi proaktivti formatqa aýystyrý usynylǵan. Keshe Eńbek jáne halyqty áleýmettik qorǵaý, Densaýlyq saqtaý ministrlikterindegi áriptestermen kezdesip, proaktivti formatqa aýystyrýdy jedeldetý týraly ýaǵdalastyq. Jaqyn arada onyń nátijesin habarlaimyn», - dedi A. Jumaǵaliev.
Sonymen birge, turǵyndar qujattarǵa apostil qoiý máselesin de kótergen.
«Shetelde júrgen adamdarǵa keide apostili bar qujat qaǵaz júzinde kerek bop, ony Qazaqstannan aldyrý qajet bolady. Ádilet ministrligi e-apostil ázirleýmen ainalysyp jatqanyn bilemin, bul qujattardy onlain alýǵa múmkindik beredi. Shamamen tamyz aiynda bul qyzmet qoljetimdi bolýy múmkin. Halyqqa qyzmet kórsetý ortalyǵynda bank qosymshalary arqyly tólem jasaýǵa bolady. Qazir de memlekettik baj salyǵy QR-kod arqyly tólenedi. Úshinshi toqsannyń sońyna deiin basqa da qyzmet túrlerin, jyljymaityn múlikti tirkeý aqysyn da QR-kodpen tóleý múmkndigin jasaýdy tapsyrdym», - dedi Asqar Jumaǵaliev.
