Elimizdiń bilim berý oshaqtarynda debat qozǵalysyn damytyp, oqýshylar men stýdentterdiń pikir-saiys qabiletin ilgeriletýshi mamandarǵa qosymsha tólemaqy jasaý ideiasy kóterildi. Bul bastamany Bilim jáne ǵylym ministri Ashat Aimaǵambetov alǵa tartty, dep habarlaidy QazAqparat tilshisi.
«Jalpy elimizdiń mektepterinde debat qozǵalysy jaqsy damyp kele jatyr deýge bolady. Balalardyń qyzyǵýshylyǵy bar. Bastysy sapaǵa jumys isteý kerek. Eger keibir mektepterde debat jattyqshyrýshysy bolmasa nemese debatty uiymdastyratyn tiisti mamandar joq bolsa, onda debattyq qozǵalys bar dep qoldan jasaý qajet emes. Bul kerisinshe pikir-saiys qozǵalysyn damytýǵa kedergi keltiredi. Sondyqtan aldymen debat ótkizýdiń mán-jaiyn biletin kadrdy daiarlap, sharýany sosyn qolǵa alý kerek. Múmkin debatty uiymdastyrýshylarǵa tólemaqy óteý jaǵyn qarastyrý kerek shyǵar», - dedi Ashat Aimaǵambetov ministrlikte ótken apparat keńesiniń jiynynda.
Ministrdiń aitýynsha, bilim berý oshaqtarynda debat qozǵalysynyń ilgerileýine úlesin qosyp jatqan mamandardy yntalandyrý kerek.
Sondai-aq, A.Aimaǵambetov «Oqýǵa qushtar mektep» jobasy týraly sóz qozǵady.
«Bul jobada jaqsy jolǵa qoiylǵan. Men jalpy óńirlerdi aralaǵanda mektep baǵdarlamasynan tys bilim berý jobalarynyń oryndalý barysyn da qadaǵalaimyn. Taiaýda saparmen Aqtóbe oblysynda boldym. Sonda sekildi Martók, Hlebodarovka, Aqjar sekildi shalǵai eldimekenderde «Oqýǵa qushtar mektep» jobasy jaqsy deńgeide júzege asyp jatyr. Sonymen qatar SQO-nyń birqatar shetkei aýyl mektepterinde de bilim jobalarynyń iske asýyn úlgi tutýǵa bolady», - deidi ol.
