Keshe, 7 qazanda Qazaqstanda 1896 adamnyń analizinen koronavirýs anyqtaldy. Eki kún buryn 187 adamǵa koronavirýs pnevmoniiasy diagnozy qoiyldy. Indet bastalǵaly beri 976 myńnan astam adamǵa koronavirýs pen "pnevmoniia" juqqan. Densaýlyq saqtaý ministrliginiń 8 qazan kúngi habarlamasynda osyndai málimet kórsetilgen.
Ótken táýlikte Almatyda – 412, Nur-Sultan qalasynda – 297, Almaty oblysynda – 174, Qaraǵandy oblysynda – 157, Pavlodar oblysynda 153 adamnan koronavirýs anyqtalǵan. Qalǵan qalalar men oblystarda ondaǵan naýqas tirkelgen.
2020 jyldyń naýryz aiynan beri 900 myń adamnyń koronavirýs testi oń shyqqan. Basym bóligi jazylǵan. 11 459-y qaitys bolǵan. 6 qazanda 37 adam koronavirýstan kóz jumǵan.
Pnevmoniianyń koronavirýs uqsas túrin Qazaqstan biligi halyqaralyq uiymdardyń qysymynyń nátijesinde 2020 jyldyń 1 tamyzynan bastap esepke ala bastaǵan. Byltyr Qazaqstanda jazda jii kezdespeitin ókpeniń qabynýy órshigen kezde DDSU "ólim qaýpi joǵary qazaqstandyq pnevmoniia" – durys anyqtalmaǵan Covid dep málimdegen.
Sodan beri resmi málimet boiynsha, 76 myńnan astam adam koronavirýs pnevmoniiasyna shaldyqqan. 4887-i qaitys bolǵan. Altaýy 6 qazanda kóz jumǵan.
Qazir respýblika boiynsha 54 myńǵa jýyq naýqas koronavirýstan emdelip jatyr. 9,4 myń naýqas statsionarda jatyr.
Qazir 6,8 million adam koronavirýsqa qarsy vaktsinanyń tolyq dozasyn alǵan. 1 mln adam ekinshi dozasyn kútip otyr. Ministr Aleksei Tsoi elge batys kompaniialary ázirlegen Pfizer vaktsinasy tórtinshi toqsanda jetkiziledi dep habarlady. Ol negizinen 12 jastan bastap balalar men jasóspirimderge, júkti áielderge salynýy tiis.
Qazir Qazaqstanda reseilik "Spýtnik V" (qazir ony Qaraǵandyda óndiredi), otandyq QazVac, qytailyq Sinopharm kompaniiasynyń BAÁ-de óndirilgen Hayat-Vax pen Qytaida óndirilgen Vero Cell ekpesi, sonymen birge taǵy bir qytailyq Sinovac kompaniiasynyń CoronaVac ekpesi qoldanylady.
Amerikalyq Djons Hopkins ýniversitetiniń málimetinshe, álemde 236 millionnan astam adamǵa koronavirýs juqqan, 4,8 milliony qaitys bolǵan.
