Qazaqstanǵa Sharm-el-Sheih pen Dýbaidan áýe reisimen kelgen 8 adamnan koronavirýstyń «britandyq shtamy» tabyldy, dep habarlaidy "Ult aqparat" Sanitarlyq-epidemiologiialyq baqylaý komiteti Ulttyq saraptama ortalyǵynyń baspasóz qyzmetine silteme jasap.
«Ortalyqtyń Nur-Sultan qalasy boiynsha molekýliarlyq-genetikalyq zertteýler zerthanasy tolyq genomdyq sekvenirleý ádisimen COVID-19 oń nátijesi bar 265 úlgini zerttedi. SARS-CoV-2 virýsynyń genetikalyq sipattamasyna bul synamalar Qazaqstan Respýblikasynyń 14 óńirinen alyndy. Nýkleotidter tizbegin taldaý nátijesinde mamandar 12 virýstan «britandyq shtamm» genotipin anyqtady. 12 shtamnyń 8 jaǵdaiy Sharm-el-Sheih (Egipet) jáne Dýbai (Birikken Arab Ámirlikteri) halyqaralyq reisteri arqyly kelgen azamattardan tabyldy», delingen habarlamada.
Ortalyqtyń málimetinshe, qazirgi ýaqytta bul elderde SARS-CoV-2 koronavirýsynyń «britandyq» jáne «ońtústikafrikalyq» shtamdary kóp baiqalýda.
«Britandyq shtamnyń» genotipi bar 4 virýs Nur-Sultan, Almaty qalalarynda jáne Aqtóbe oblysynda tabyldy. Bul virýs shetelden kelgen azamattardan taralǵan bolýy múmkin», delingen habarlamada.
