QR Bas Prokýrorynyń orynbasary Marat Ahmetjanov brakonerlik qylmysy úshin jazany kúsheitý sharalaryn túsindirdi, dep habarlaidy "Ult aqparat".
Memleket basshysy qol qoiǵan Qylmystyq, qylmystyq-protsestik zańnamany jetildirý boiynsha QR Zańy arqyly zańsyz ań aýlaý (QK 335-baby) jáne zańsyz balyq aýlaý (QK 337-baby) teris qylyqtan aýyrlyǵy ortasha qylmystar sanatyna aýystyryldy.
«Atalǵan faktiler úshin 4 jylǵa deiin bas bostandyǵynan aiyrý, 10 mln teńgege deiin aiyppul salý qarastyrylǵan. Qoryqtaǵy balyqtardyń sirek kezdesetin túrlerine jáne Qyzyl kitapqa enggen janýarlardy zańsyz aýlaý úshin 6 jylǵa deiingi merzimge bas bostandyǵynan aiyrýǵa, al qylmystyq toptyń quramynda nemese asa iri mólsherde qylmys jasalsa – 10 jylǵa deiingi merzimge bas bostandyǵynan aiyrý kózdelgen», - dedi Marat Ahmetjanov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Sonymen birge, qylmys quraldaryn, kólik quraldaryn jáne brakonerlerdiń múlkin mindetti túrde tárkileý engiziledi.
Aita keteiik, Marat Ahmetjanov elimizdegi qylmys ahýaly týraly, sondai-aq qylmystyq, qylmystyq-protsestik zańnamany jetildirý boiynsha QR Zańyn túsindirdi. Atalǵan zańǵa QR Prezidenti 2019 jyldyń 28 jeltoqsanynda qol qoidy jáne 2020 jyldyń 1 qańtarynda kúshine enedi.
