Qazaqstanda biyl kúzgi shaqyrylymda 17 myńnan astam azamat áskerge alynady. Bul týraly OKQ-da ótken baspasóz máslihatynda QR QK BSh Uiymdastyrý-jumyldyrý jumystary departamentiniń bastyǵy, polkovnik Sáken Júsipov málim etti, dep habarlaidy QazAqparat.
«Azamattardy áskerge shaqyrýdyń kúzgi naýqany bastaldy. Jergilikti atqarýshy organdar qurǵan meditsinalyq jáne áskerge shaqyrý komissiialary óz jumystaryna kiristi. Qyrkúiekten jeltoqsanǵa deiingi aralyqta Qarýly kúshter, basqa da áskerler men áskeri qurylymdar qataryna 17 myńnan astam 18-27 jas aralyǵyndaǵy er azamatty áskerge shaqyrý josparlanyp otyr. Áskerge shaqyrý jáne belgilengen merzimde zapasqa shyǵarý kezinde qoldanystaǵy zań basshylyqqa alynady», - dedi Sáken Júsipov OKQ-da ótken baspasóz máslihatynda.
Onyń aitýynsha «Áskeri qyzmet jáne áskeri qyzmetshilerdiń mártebesi týraly» zańnyń 27-baby 3-tarmaǵyna sáikes azamattardy áskerge shaqyrýdy jergilikti atqarýshy organdar uiymdastyrady.
«Budan buryn da aitylyp júrgendei Qazaqstan Qarýly kúshterinde koronavirýs infektsiiasynyń aldyn alý jáne onyń taralýyna jol bermeý sharalary júzege asyrylady. Qorǵanys ministrliginiń tapsyrmasy boiynsha áskerge shaqyrý jáne jiyn-pýnktterinde, Qarýly kúshterdiń áskeri bólimderinde sanitariialyq-epidemiologiialyq sharalar kúsheitildi. Onyń nátijesinde áskeri ortaǵa koronavirýstyń jappai taralýyna jol berilgen joq», - dedi ol.
