Qazaqstanda 17 sáýir kúni Covid infektsiiasyn juqtyrǵany PTR ádisimen rastalǵan 2828 adam tirkeldi. Onyń jartysyna jýyǵy - Almaty men Nur-Sultan úlesinde.
Indettiń taraýy jóninen alda kele jatqan Almaty qalasynda koronavirýspen bir kúnde 677 adam tirkelgen. Bul – aldyńǵy kúnderdegimen shamalas kórsetkish. Qalada kúndelikti anyqtalatyn naýqas sany boiynsha rekord 8 sáýir kúni ornaǵan. Sol kúni qalada 717 naýqas shyqqan. Osylaisha, Almatyda Covid infektsiiasyn juqtyrǵany rastalǵan adamdardyń jalpy sany 45,5 myńnan asyp otyr.
Irgeles jatqan Almaty oblysynda 248 naýqas shyqqan. Bul – táýlik kórsetkishi boiynsha aimaqtar arasyndaǵy úshinshi nátije. Oblysta keiingi kúnderi táýlik saiyn ondaǵan adam koronavirýs pnevmoniiasymen (KVI-) tirkelip júr.
Nur-Sultanda bir kúnde 636 naýqas tirkelgen. Elordada osymen tórt kún qatarynan táýlik saiyn 600-den astam naýqas anyqtalyp otyr. Qalada indet bastalǵaly barlyǵy 39 myńnan astam adamnyń Covid infektsiiasyn juqtyrǵany rastalǵan.
18 sáýirdegi jaǵdaiy boiynsha, Qazaqstanda 37 749 adam koronovirýs infektsiiasynan (37 294 KVI+ jáne 455 KVI-) emdelip jatyr.
Olardyń ishinde 13 526 patsient - statsionarda, 24 223 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 671 adamnyń jaǵdaiy aýyr;
• 171 patsienttiń jaǵdaiy óte aýyr;
• 109 naýqas jasandy tynys alý apparatynda jatyr.
Koronavirýstan bir kúnde 1806 adam emdelip shyqqan.
Qazaqstanda osylaisha, virýs juqtyrǵany rastalǵandardyń jalpy sany 287 myńnan asyp otyr. Onyń 246 myńnan astamy jazylyp úlgergen.
Densaýlyq saqtaý ministrligi 1 tamyzdan bastap Covid juqtyrǵany PTR ádisimen rastalmaǵan, biraq aýrý belgileri boiynsha soǵan uqsaityn koronavirýs pnevmoniiasynyń esebin júrgizip keledi. 1 tamyz ben 15 sáýir aralyǵynda pnevmoniianyń bul túrimen barlyǵy 51 763 adam tirkelgen. Onyń 748-i qaitys bolǵan.
Djons Hopkins ýniversitetiniń dereginshe, álemde koronavirýspen barlyǵy 140 millionnan astam adam tirkelgen. Onyń 80 milliony jazylǵan, 3 milliony qaitys bolǵan.
Qazaqstanda anyqtalǵan naýqas sany (tolyq derek):
- Almaty qalasynda - 45586 (+677),
- Nur-Sultan qalasynda - 39332 (+636),
- Shyǵys Qazaqstan oblysynda - 23801 (+105),
- Atyraý oblysynda - 20585 (+127),
- Qaraǵandy oblysynda - 20519 (+210),
- Pavlodar oblysynda - 19781 (+37),
- Batys Qazaqstan oblysynda – 17065 (+109),
- Aqmola oblysynda – 16762 (+102),
- Almaty oblysynda - 18304 (+243),
- Qostanai oblysynda - 14365 (+29),
- Soltústik Qazaqstan oblysynda - 13579 (+45),
- Shymkent qalasynda - 8181 (+126),
- Aqtóbe oblysynda - 7484 (+200),
- Jambyl oblysynda - 7041 (+43),
- Mańǵystaý oblysynda - 4962 (+33),
- Túrkistan oblysynda - 4891 (+48),
- Qyzylorda oblysynda - 4763 (+58).
