QR Indýstriia jáne infraqurylymdyq damý ministrligi qazirgi tańda Qazaqstandaǵy farmatsevtikalyq jáne tigin kásiporyndarynyń bári tolyq júkteme kezinde táýligine 1 mln danaǵa deiin maska óndire alatynyn jariialady, dep habarlaidy "Ult aqparat".
Ministrliktiń málimetine súiensek 2020 jyldyń 23 naýryzynda barlyq maskanyń kúndik kólemi 725 myń danany quraǵan. Onyń 221 myńyn farmatsevtikalyq kompaniialar óndirse, 504 myńyn tigin kompaniialary shyǵarǵan. Qoimalarda qazirgi tańda 584 myń dana maska bar.
«Aqparat aldymen meditsinalyq maska satatyn «SK-Farmatsiia» JShS-ge beriledi. Densaýlyq saqtaý ministrligi óndirilgen ónimderdi eldiń óńirleri boiynsha taratady. Dákeli men mataly maskalar jergilikti bilik organdarymen kelisimshart negizinde satylady. Búgingi kúni meditsinalyq betperdeler shyǵarý boiynsha jumystardy táýlik boiy otandyq kásiporyndar júrgizýde. Olar: «Dolce» JShS (Almaty oblysy), «Super-pharm» JShS (Jambyl oblysy), «Mega Pharma» JShS (Jambyl oblysy), «Medical Active Group» JShS (Almaty), «Merýsar» JShS (Pavlodar), «TK-Farm Aqtóbe» JShS (Aqtóbe). Budan basqa jergilikti atqarýshy organdarmen birlesip maska óndirisine 70-ten astam tigin kásiporny, atap aitqanda «Dalatex» JShS (Qyzylorda), «Bolshevichka» JShS (Qostanai), «Eko-Farm» JShS (Shymkent), «As Farm» JShS (ShQO), «Tynys» AQ (Kókshetaý), «KazLegProm» JShS (Almaty), «Janarys» JShS (Mańǵystaý oblysy) kompaniialary tartyldy», - dep habarlaidy IIDM baspasóz qyzmetinen.
Tigin jáne farmatsevtika kásiporyndaryn maska óndirýge arnalǵan shikizatpen qamtamasyz etý maqsatynda ministrlik «Azala Textile» JShS-men birge dáke óndirisin bastaý týraly máseleni pysyqtaǵan. Qazirgi tańda qýattylyǵy táýligine 3,6 myń qýma metr bolatyn 3 stanok iske qosylǵan.
«Búgingi kúni barlyq farmatsevtikalyq jáne tigin kásipornynyń qýaty tolyq júkteme kezinde táýligine 1 mln danaǵa deiin maska óndirýge múmkindik beredi. Otandyq tigin kásiporyndary maqta-mata matalardan (dáke, bóz, mitkal) kóp rettik 4,8,16 qabatty maska shyǵarady», - dep habarlaidy ministrlikten.
