Keshe, 24 qyrkúiekte Qazaqstanda 2324 adamnyń analizinen koronavirýs anyqtaldy. 2954 adam jazyldy. Senbi tańerteń Densaýlyq saqtaý ministrligi osylai dep habarlady.
Ótken táýlikte eń kóp naýqas Almatyda (510) tirkelgen. Almaty oblysynda - 262, Qaraǵandy oblysynda 261 adamnan koronavirýs anyqtalǵan.
Indet bastalǵaly beri Qazaqstanda 874 myń adamnyń PTR testi oń kórsetken. Djons Hopkins ýniversitetiniń málimetinshe, Qazaqstan álemde bir aida tirkelgen naýqastar sany jóninen 25-orynda tur. Koronavirýs pnevmoniiasyna shaldyqqandardy qosqanda Qazaqstanda barlyǵy 947 myń adam koronavirýspen aýyrǵan. 28 kúnde 110 myń naýqas tirkelgen.
Qazaqstan biligi koronavirýs pnevmoniiasyna shaldyqqandardy 2020 jyldyń 1 tamyzynan beri eseptep keledi, biraq ony Covid statistikasyna qospai keledi. Al halyqaralyq uiymdardyń statistikasynda ol birge esepteledi. Byltyr Qazaqstanda jazda jii kezdespeitin ókpeniń qabynýy órshigen kezde DDSU "ólim qaýpi joǵary qazaqstandyq pnevmoniia" – durys anyqtalmaǵan Covid dep málimdegen.
23 qyrkúiekte Qazaqstanda 200 adamǵa koronavirýs pnevmoniiasy diagnozy qoiylǵan. Elde eki kún buryn 54 adam ólimi tirkelgen: 46 adam – koronavirýstan, 8 adam koronavirýs pnevmoniiasynan qaitys boldy dep aitylady.
2020 jyldyń naýryzynan beri PTR testi oń kórsetkender arasynda 10 999 adam qaitys boldy. Byltyr tamyzdan beri koronavirýs pnevmoniiasyna shaldyqqandar arasynda 4784 adam ólimi tirkelgen.
Ólim-jitimniń sebebin zertteý komissiiasy 2,6 myń adamnyń ólimine – koronavirýs emes, basqa aýrý sebep boldy dep aitqan. Olar Covid statistikasyna engizilmegen.
Qazir respýblika 64 myń adam koronavirýstan emdelip jatyr. 11 myńy statsionarda jatyr. 895 adamnyń jaǵdaiy aýyr, 230 patsienttiń jaǵdaiy óte aýyr. 138 naýqas jasandy tynys apparatyna qosylǵan.
Aqpan aiynan beri 6,3 mln adam koronavirýsqa qarsy vaktsinanyń tolyq dozasyn alǵan. 1,1 mln adam ekinshi dozasyn kútip otyr.
