Bir aptada el aýmaǵynda 3 myńnan astam qylmys tirkeldi. Bul týraly QR Ishki ister ministrliginiń resmi ókili Nurdildá Oraz aitty, dep habarlaidy QazAqparat.
«Eldegi krimiogendi jaǵdaiǵa toqtalaiyq, bir apta ishinde 3 354 qylmys jasaldy, onyń 2 273-i táýlik ishinde ashyldy», - dedi Nurdildá Oraz onlain birifingide.
Resmi ókildiń aitýynsha, politsiia qyzmetkerleri «izin sýytpai» 11 kisi óltirýdi, 10 ólimge ákep soqqan densaýlyqqa qasaqana aýyr ziian keltirýdi, 1 qaraqshylyq, 35 tonaý jáne 536 bóten múlikti urlaý qylmystaryn anyqtaǵan.
Sonymen birge, Oraz Ishki ister ministriniń atyna azamattardan politseilerge alǵys aitqan hattar jii túsetinin atap ótti.
«Máselen, Shyǵys Qazaqstan oblysynyń turǵyny Ádilbek Netbaev Anyqtaý basqarmasynyń bastyǵy Qazbek Taqjanovqa jáne anyqtaýshy Tatiana Titarenkoǵa qylmystyq isti tergeýdegi jedeldigi úshin alǵys aitty. «Men Politsiia departamentine júgingenimde olar ótinishime birden nazar aýdardy. Olardy saýatty ári jedel is-áreketteri nátijesinde óndiristik jaraqat faktisi boiynsha qylmystyq is sotqa joldandy», - dep jazady Ádilbek Netbaev. Ol sondai-aq politseilerdiń qyzmette tabys tiledi», - deidi Oraz.
