Qazaqstanda benzinge aktsiz kóterilýi múmkin. Bul týraly QR Ulttyq ekonomika ministri Rýslan Dálenov málim etti, dep habarlaidy "Ult aqparat".
«Búginde benzinniń árbir litrinde aktsiz bar, onyń somasy - 8 teńge. Qazirgi kezde aktsizdi taǵy 10 teńgege kóterý talqylanyp otyr. Bul qadam ne úshin usynylyp otyr? Ózderińiz bilesizder, biýdjettik shyǵystar eleýli kólemde ósti, onyń ishinde áleýmettik mindettemeler artty. Respýblikalyq biýdjette áleýmettik salaǵa arnalǵan shyǵystar 45 paiyzdan asty. Bul turǵyda biýdjettik konsolidatsiia qajettigi bar, onyń ishinde aktsizderdiń fiskaldy qyzmeti arqyly. Qaýlynyń jobasy qazir buqarada talqylanýda, osy oraida túrli usynystar jasalyp jatyr», - dedi Rýslan Dálenov Senatta tilshiler saýalyna jaýap bere otyryp.
Onyń sózine qaraǵanda, aktsizdi arttyrýdyń aldyn ala datasy biylǵy jyldyń 1 jeltoqsanyna josparlanyp otyr. Búginde AI-92 benzininiń litri shamamen 150 teńge, kei jerlerde 149-152 teńge aralyǵynda.
«Aktsizdiń stavkasy tek 8 teńge, kórshiles eldermen salystyrǵanda bul kórsetkish óte tómen. Shetelde benzinniń jarty qunyn aktsiz quraidy. Bizde atalǵan usynys áli de talqylaý barysynda», - dedi ministr.
Vedomstvo basshysy atalǵan usynysqa bailanysty benzin baǵasynyń ósýi múmkindigine pikir bildirdi.
«Eger de aktsiz qosylsa, benzin alty paiyzǵa qymbattaidy dep oilaimyn. Al eger sol deńgeide qalsa, burynǵy baǵa saqtalady. Shamamen 10 teńgege qymbattaýy yqtimal», - dedi Rýslan Dálenov.
