Qazaqstan Qurylysshylar odaǵynyń basshysy Talǵat Erǵaliev turǵyn úige muqtajdardyń birneshe ese kóbeietinin boljap otyr, dep habarlaidy QazAqparat.
«Qazir baspanaǵa muqtaj 2 mln adam bar. Ýrbanizatsiianyń qarqynyn eskersek, baspanaǵa muqtaj taǵy 5 million adamnyń qalaǵa aǵylatynyn bolaýǵa bolady. Nátijesinde turǵyn úige qajettiligi bar halyq sany 7 millionnan asýy múmkin. Biraq bul tek elordada ǵana emes, barlyq qalalarda», - dedi Talǵat Erǵaliev uiym otyrysynyń aldynda BAQ ókilderine bergen suhbatynda.
Ol bul oiyn mynadai boljamdarmen túsindirdi.
«Aýyl turǵyndary oblys ortalyqtary men qalalarǵa, Nur-Sultan, Shymkent jáne Almaty siiaqty iri qalalarǵa kóshedi. Mundai jaǵdai 10 jyl ishinde kútiledi. Óitkeni, iri qalalar men oblys ortalyqtaryndaǵy ómir súrý deńgeii aýyldyq jerlerge qaraǵanda jaqsy. Búginde aýylda qajet mamandyqtar boiynsha kóptegen granttar berilip jatyr. Iaǵni, aýyl jastarynyń oqýǵa kelýi burynǵydan da kóbeiedi. Al qalada biraz ýaqyt oqyp, ómir súrgen adamdar aýylǵa oralǵysy kelmeidi. Osynyń bárin oilap, kóshi-qon úrdisin osylai boljap otyrmyz», - dedi Qurylysshylar odaǵynyń basshysy.
