Ósirilgen balyq kólemi 2030 jylǵa qarai jylyna 270 myń tonnaǵa deiin ulǵaitylady. Bul týraly QR Ekologiia, geologiia jáne tabiǵi resýrstar ministrliginiń vitse-ministri Ahmetjan Pirimqulov málim etti, dep habarlaidy QazAqparat.
«Baǵdarlamada ósirilgen balyq kólemin 2030 jylǵa qarai jylyna 270 myń tonnaǵa deiin ulǵaitý mindeti qoiylǵan. Ol úshin 1 myńnan astam jańa balyq ósirý sharýashylyqtary qurylatyn bolady. Jedel aqparat boiynsha, jyl basynan beri balyq ósirýshiler shamamen 12 myń tonna taýarlyq balyq ósirgen, jospar boiynsha 12,8 myń tonna. Jyl sońyna deiin bul kórsetkish tolyq kólemde oryndalatyn bolady», - dedi Ahmetjan Pirimqulov Úkimet otyrysynda.
Onyń aitýynsha, sonymen birge balyq aýlaý kólemi ótken jylmen salystyrǵanda 3%-ǵa ósti.
«Balyq sharýashylyǵy salasyndaǵy biznes úshin zańnamalyq deńgeide qolaily jaǵdailar jasalýda. Eń mańyzdysy, qoldanystaǵy memlekettik qoldaý sharalaryn keńeitý, balyq ósirý sharýashylyqtaryna olardyń qurylysy men jumys isteýi kezinde artyq talaptardy alyp tastaý bolyp otyr. Sonyń arqasynda aǵymdaǵy jyly agroónerkásip kesheninde balyq óndirý boiynsha 9 investitsiialyq joba iske asyryldy. 280 jumys ornyn qurýmen jáne 3,2 mlrd teńge jeke investitsiialardy tartýmen olardyń jalpy qýattylyǵy shamamen 10 myń tonnany quraidy», - dedi vitse-ministr.
Atalǵan balyq ósirý sharýashylyqtarynyń birqatary forel, tilapiia, afrikalyq jaiyn siiaqty balyqtardyń jańa túrlerin ósiredi: Olar Qazaqstan úshin dástúrli emes, biraq qysqa merzimde taýar massasyn alý esebinen kommertsiialyq jaǵynan tartymdy bolyp sanalady. Eń iri jobalar Túrkistan, Aqtóbe jáne Shyǵys Qazaqstan oblystarynda júzege asyryldy.
Balyq ósirý jobalarymen birge Qyzylorda oblysynda ornalasqan eki balyq óńdeý jobasy iske asyryldy.
