Foto: QR OAM
Astanada ótip jatqan jyl saiynǵy ustazdardyń Respýblikalyq tamyz konferentsiiasy aiasyndaǵy paneldik sessiialarda elimizdegi Balalardyń quqyqtaryn qorǵaý jónindegi alǵashqy basqarmanyń Aqtóbe oblysynda qurylǵany týraly habarlandy.
Eske salaiyq, basqarmalardy qurý – qorǵanshylyq jáne qamqorshylyq organdarynyń jumysyn kúsheitýge baǵyttalǵan reformanyń bir bóligi. Jańa basqarmalar balalardyń quqyqtary men múddelerin qorǵaýda negizgi býynǵa ainalady. Olardyń mindeti – ótinishterge jedel áreket etý, otbasylarǵa kómek kórsetý jáne óńirdegi bala ál-aýqatyna jaýapty barlyq qyzmetterdiń jumysyn úilestirý.
Jergilikti atqarýshy organdardyń bazalyq qurylymyna Balalardyń quqyqtaryn qorǵaý basqarmasyn qurýdy kózdeitin ózgerister engizildi. Basqarmaǵa oblystyq jáne respýblikalyq mańyzy bar qalalar men aýdandardaǵy balalardyń quqyqtaryn qorǵaý bólimderi, sondai-aq elordadaǵy tiisti bólimder baǵynady.
«Biz ár balanyń senimdi qorǵalýyn qamtamasyz etetin júie quryp jatyrmyz. Bul máselelerdi jedel sheshýge jáne balalarǵa jergilikti deńgeide kómek kórsetýge múmkindik beredi», – dedi QR Oqý-aǵartý ministrligi Balalardyń quqyqtaryn qorǵaý komitetiniń tóraiymy Nasymjan Ospanova.
Atalǵan bólimshelerdiń tiimdi jumys isteýi úshin Oqý-aǵartý ministrligi zańnamalyq deńgeide norma bekitti – qorǵanshylyq jáne qamqorshylyq organynyń bir mamany 5 myń balaǵa qyzmet kórsetedi. Sonyń nátijesinde biylǵy jyldyń basynan beri jergilikti deńgeidegi qyzmetkerler sany 303-ten 896-ǵa ósti. Olar úshin oqytý kýrstary uiymdastyrylyp, biryńǵai jumys standarttary engizilýde.
Joba QR Bala quqyqtary jónindegi ýákilmen birlesip júzege asyrylýda jáne elimizdiń barlyq óńirlerinde kezeń-kezeńimen engiziletin bolady.
