Qazaqstanda bala asyrap alýshylarǵa kómek kórsetetin ulttyq agenttik qurylady. Bul týraly QR Bas prokýrorynyń orynbasary Marat Ahmetjanov málim etti, dep habarlaidy QazAqparat.
«Zań jobasy aiasynda «Neke jáne otbasy týraly» Kodekske (bala) asyrap alý jónindegi agenttikti akkreditteý tártibi engiziledi. Olar jetim balalardy asyrap alýshylarǵa psihologiialyq, konsýltativtik kómek kórsetetin bolady», - dedi M. Ahmetjanov. Parlament Senatynda qylmystyq jáne qylmystyq-protsestik zańnamany jetildirý máseleleri boiynsha zań jobasyn talqylaý kezinde.
Keiinnen tilshiler saýalyna jaýap berý kezinde M. Ahmetjanov ulttyq agenttik qurylatynyn jáne ol bala asyrap alýshylarǵa tiisti qoldaý sharalaryn (psihologiialyq jáne kosýltativtik kómek) atqaratynyn jetkizdi.
«Qazirgi tańda sheteldik agenttikter elimizde bar. Olar jumys istep jatyr. Endi sondai ókilettikti bizdiń ulttyq agenttikke berý kózdelip otyr. Bul turǵyda eshqandai memlekettik ókilettik olarǵa berilmeidi. Balany asyrap alýdy tek qana sot sheshedi. Bul másele bizdiń memlekettik organdardyń quzyretinde. Atalǵan agenttikti memleket qarjylandyrmaidy. Ókinishke qarai, mamandar búginde biraz ata-ana balany asyrap alýǵa daiyn emestigin aitýda. Osynyń saldarynan jetkinshekter balalar úilerine qaityp kelip jatyr. Sondyqtan osy máseleni zerttep, ata-anany tolyq daiyndap, akkreditteý kerek. Atap aitqanda, eń sońǵy túpkilikti sheshimdi sot qabyldaidy. Sot jan-jaqty qarap, zańǵa qaishy nemese kúdikti jaǵdailar bolsa, balany asyrap alýǵa berýden bas tartýǵa tolyq mindetti», - dedi QR Bas prokýrorynyń orynbasary.
