Foto: bakertilly.ua
Jyl saiyn Qazaqstan aýmaǵynda 102,3 tekshe shaqyrym sý qory jinalady. Onyń ishinde 1,2 tekshe shaqyrymy, iaǵni, jalpy sý kóleminiń 1%-dan astamy turǵyndardy aýyz sýmen qamtýǵa jumsalady, dep habarlaidy Kazinform agenttigi.
Parlament Májilisiniń depýtaty Sergei Ponomarevpen dialog barysynda Sý resýrstary jáne irrigatsiia birinshi vitse-ministri Bolat Bekniiaz turǵyndardy sapaly aýyz sýmen qamtamasyz etý jumysy týraly aitty.
Ekonomikanyń qajettiligi úshin jyldyq sý tutyný shamamen 25 tekshe shaqyrymdy quraidy.
Onyń 65 paiyzy — aýyl sharýashylyqtyń, 25 paiyzy — ónerkásip qajettilikterine baǵyttalady.
«Sol sebepti qazaqstandyqtar aýyz sýdan taryǵady dep aitýǵa bolmaidy. Barlyq normativtik qujattarda, Sý kodeksinde eń birinshi orynda azamattarymyzdy aýyz sýmen qamtamasyz etý máselesi tur. Biz aldaǵy 2 jylda elimizdiń barlyq óńirin ortalyqtandyrylǵan sý júiesimen qamtamasyz etýdi josparlap otyrmyz. Qandai tabiǵi jaǵdai bolmasyn, klimat ózgerisi nemese transshekaralyq sý resýrstarynyń azaiýy aýyz sý tapshylyǵyna ákelmeidi. Sebebi turǵyndarǵa qajetti aýyz sý kólemi jalpy sý qorynyń 1%-yn ǵana quraidy», — dedi sý resýrstary jáne irrigatsiia birinshi vitse-ministri Bolat Bekniiaz.
