2060 jylǵa qarai Qazaqstanda ziiandy shyǵaryndylar kólemi 473 million tonnadan asýy múmkin. Bul týraly QR Ekologiia, geologiia jáne tabiǵi resýrstar ministri Serikqali Brekeshev aitty, dep habarlaidy QazAqparat.
«Eýropalyq Odaq 2023 jyldan bastap kómirtekti qajetsinetin ónimder importyna salynatyn shekaralyq kómirtek salyǵyn engizýdi josparlap otyr. Bul halyqaralyq saýda erejelerin túbegeili ózgertetin bolady. Parij kelisimi aiasynda Qazaqstan ózine 2030 jylǵa qarai shyǵaryndylardy 1990 jylǵy deńgeiden 15 paiyzǵa, al halyqaralyq qoldaý kórsetiletin jaǵdaida 25 paiyzǵa qysqartý mindettemesin aldy», - dedi ministr Ortalyq kommýnikatsiialar qyzmetindegi baspasóz máslihatynda.
Alaida, ministr búgingi tańda shyǵaryndylar 1990 jylǵy deńgeiden áldeqashan asyp ketkenin aitady.
«Aitarlyqtai is-sharalar qabyldanbasa, boljam boiynsha jalpy shyǵaryndylardyń ulǵaiýy jalǵasyp, 2060 jyly 473 million tonnadan asatyn bolady», - dedi ol.
Osy rette Serikqali Breshekev Qazaqstan Respýblikasynyń Parij kelisiminiń temperatýralyq talabyn saqtaý, sondai-aq Memleket basshysynyń kómirtegi beitaraptyǵyna qol jetkizý týraly málimdemesin iske asyrýǵa úles qosý úshin 2060 jylǵa deiin kómirtegi beitaraptyǵyna qatysty doktrinasynyń jobasy ázirlengenin atap ótti.
«Doktrinany ázirleý kezinde naqty ekonomikany modeldeý úshin eń ozyq TIMES, CGE jáne System Dynamics úlgileri qoldanyldy. Bul barynsha az investitsiialyq shyǵyndar jumsaý jáne barynsha kóp ekonomikalyq paida alý turǵysynan alǵanda Qazaqstan ekonomikasyn kómirsizdendirýdiń eń ońtaily jolyn anyqtaýǵa múmkindik berdi», - dedi ministr.
