Oral qalasyndaǵy oblystyq perinataldyq ortalyqta erekshe jaǵdai boldy. Anatomiialyq ereksheligi - eki jatyry bar áiel aldymen bir balany, al eki aidan keiin ekinshisin dúniege ákeldi, dep habarlaidy Sputnik agenttigi uralskweek.kz saityna silteme jasap.
Liliia Konovalova birinshi balany mamyr aiynda týdy. Shala týǵan qyzdyń salmaǵy 850 gramm bolǵan. Ony birden jansaqtaý bólimine jatqyzdy. Dárigerler sábidiń densaýlyǵyn únemi baqylap otyrdy. Arnaiy ońaltý sharalary uiymdastyrylǵan.
"Al 9 tamyzda kesar tiligin jasaý arqyly qyzdyń inisi dúniege keldi. Onyń salmaǵy – 2 900 gramm. Qazirgi kezde anasy eki balasymen perzenthanadan shyǵýǵa daiyndalyp jatyr", - deidi bas neonatolog Nurgúl Júnisova.
Egizderdiń anasy sharshańqy kórinse de, baqytty ekenin jasyrmady. Onyń aitýynsha, endi úidegi úlken qyzdyń eki baýyry bolady.
"Meniń taǵy bir 7 jasar qyzym bar. Ekinshi qyzdyń atyn Leia dep qoiamyz. Al ulymyz – Maksim. Men anatomiialyq ereksheligim týraly bilgenmin, biraq oǵan eshqashan mán bermeppin", - dedi Liliia Konovalova jýrnalisterge bergen suhbatynda.
Basylymnyń habarlaýynsha, sońǵy 60 jyldyń ishinde álem boiynsha mundai jaǵdailardyń sany 70-ten asty, al Qazaqstanda alǵash ret bolyp otyr.
Perzenthana dárigerleri kelinshektin anatomiialyq ereksheligi - eki jatyry baryn bilgenin aitady. Sondyqtan ekinshi balaǵa tolǵaqtyń qashan keletinin kútti.
"Biz kelinshektiń anatomiialyq ereksheligi týraly birden bildik. Sol sebepti ekinshi balany da osy jerde bosandyryp alýǵa sheshim qabyldaǵan bolatynbyz. Bilýimshe, bul - alǵashqy oqiǵa. Men Almatydaǵy áriptesterimnen keńes aldym, bul elimizde tirkelgen alǵashqy jaǵdai siiaqty", - dedi perzenthana direktorynyń orynbasary Eset Eralin.
