Qazaqstanda 2021 jylǵy 1 qańtardan bastap memlekettik uiymdardyń 38,5 myńnan astam áleýmettik qyzmetkeriniń jalaqysy ósedi. Bul maqsatqa respýblikalyq biýdjetten aldaǵy úsh jylǵa shamamen 95 mlrd teńge bólinedi, dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
Jalaqyny kóterý óz qyzmetin statsionarlyq (qarttar men múgedekterge arnalǵan úiler) jáne jartylai statsionarlyq úlgidegi meditsinalyq-áleýmettik mekemelerde (budan ári – MÁM) (kúndiz bolý bólimsheleri, ońaltý ortalyqtary), ýaqytsha bolý mekemelerinde (belgili bir turǵylyqty jeri joq adamdarǵa, turmystyq zorlyq – zombylyq qurbandaryna arnalǵan ońaltý ortalyqtary) júzege asyratyn negizgi personal (áleýmettik qyzmetkerler) men basshy quramǵa, sondai-aq úide qyzmet kórsetetin áleýmettik qyzmetkerlerge qatysty bolady.
Nátijesinde 2021 jylǵy 1 qańtardan bastap laýazymdyq jalaqyny ulǵaitý jolymen áleýmettik qyzmetkerler úshin jalaqy 1,5 esege, 2022 jylǵy 1 qańtardan bastap aǵymdaǵy mánnen 1,75 esege, al 2023 jyly 2 esege ósedi.
Sonymen qatar, MÁM ákimshilik jáne kómekshi qyzmetkerleriniń jalaqysyn laýazymdyq jalaqyǵa qosymsha aqyny 30-dan 40% - ǵa deiin arttyrý arqyly kóterý josparlanýda.
Qyzmet kórsetiletin kontingenttiń ereksheligin eskere otyryp (jalǵyzilikti qarttar, múgedek adamdar, onyń ishinde eresekter men psihonevrologiialyq aýrýlary bar, tirek-qimyl apparaty buzylǵan balalar) áleýmettik qyzmetkerlerden joǵary psihoemotsionaldyq daiyndyq, kútim jáne úzdiksiz baqylaý, ońaltý rásimderin júrgizý talap etiledi.
«Bul jyl barlyǵyna qiyn boldy. Bizdiń áleýmettik qyzmetkerler mekemelerde is júzinde turdy, erekshe kontingentpen jumys jasady. Biz olardyń eńbegin baǵalaimyz jáne olardyń mańyzdylyǵyn túsinemiz. Bul shara áleýmettik salaǵa mamandardy tartýǵa, qyzmetkerlerdiń tapshylyǵyn azaitýǵa jáne kadrlyq jaǵdaidy turaqtandyrýǵa múmkindik beredi dep úmittenemiz», – dep atap ótti QR Eńbek jáne halyqty áleýmettik qorǵaý ministri Birjan Nurymbetov.
