QR Eńbek jáne halyqty áleýmettik qorǵaý ministrliginde áleýmettik jumystyń basym baǵyttary máseleleri jónindegi vedomstvoaralyq keńestiń otyrysy ótti.
Bul týraly QR Eńbek jáne halyqty áleýmettik qorǵaý ministrliginiń baspasóz qyzmeti habarlady.
Keńeste Eńbek ministrliginiń ókilderi Qazaqstanda kórsetiletin áleýmettik qyzmetterdi jańǵyrtýdyń 2025 jylǵa deiingi ulttyq josparynyń jobasyn tanystyrdy.
QR Eńbek jáne halyqty áleýmettik qorǵaý vitse-ministri Erlan Áýkenovtiń tóraǵalyǵymen ótken sharaǵa QR Bala quqyqtary jónindegi ýákil Arýjan Sain, jergilikti atqarýshy organdardyń, meditsinalyq, áleýmettik mekemelerdiń, áleýmettik jumystyń basym baǵyttary máseleleri jónindegi vedomstvoaralyq keńestiń ókilderi qatysty.
Onlain rejimdegi jiyn barysynda Arýjan Sain qazirgi tańda qoǵam ómirine júieli ózgerister enip jatqanyn, olardyń ulttyq josparda kórinis tapqanyn atap ótti.
«Biz balalardyń múgedektigin azaitý jónindegi jol kartasyn qabyldadyq. Odan bólek skriningtik diagnostika satysynda qajetti meditsinalyq jáne pedagogikalyq kómek alý úshin múmkindigi shekteýli balalarǵa keshendi kómek kórsetý jónindegi 2021-2023 jyldarǵa arnalǵan jol kartasyn qabyldandy. Bul degenimiz balalardyń tólemderge, tehnikalyq ońaltý quraldaryna jáne áleýmettik qyzmetterge muqtajdyǵyn tómendetýge yqpal etýi tiis. Jol kartasy 3 jylǵa eseptelgen, ony kelesi jyldan bastap iske asyramyz. Bizdi barlyq múddeli organ qoldaidy degen úmit bar, óitkeni bul bárimizge ortaq is. Sheshilýi qajet mańyzdy mindetterdiń biri - áleýmettik sala qyzmetkerleriniń mártebesi men jaǵdaiy. Eger biz kásibi kadrlardy tartpasaq, adamdardyń óz jumysyna degen yntasyn qoldamasaq ózgeris jasaý qiyn. Sondyqtan men áleýmettik qyzmetkerlerdiń jalaqysyn kóterýdi tolyqtai quptaimyn jáne munyń múmkindiginshe tezirek bolǵanyn qalaimyn», – dep atap ótti Arýjan Sain.
Sondai-aq, keńes barysynda Ulttyq jospar jobasy boiynsha ministrlikkke qarasty Áleýmettik qyzmetter saiasatyn damytý departamentiniń direktory Dámejan Sádýaqasova sóz sóiledi.
«Memleket basshysynyń Joldaýyn oryndaý aiasynda «Otbasy jáne bala institýtyn qoldaý, inkliýzivti qoǵam qurý» baǵyty belgilengenin atap ótkim keledi. Osy jumys sheńberinde bizde Áleýmettik jumys máseleleri jónindegi vedomstvoaralyq keńes jumys isteidi. Áleýmettik jumys jónindegi ulttyq resýrs ortalyǵy quryldy. Áleýmettik qyzmetter portaly engizildi, barlyq óńirde otbasyn qoldaý ortalyqtary quryldy», – dedi spiker.
Aita keteiik, qazirgi ýaqytta elimizde áleýmettik qyzmetkerler testten ótip jatyr. Osy jyldyń 5 jeltoqsanyna deiin shamamen 12 myń adamdy synaqtan ótkizý josparlanýda. Test áleýmettik qyzmetkerlerdiń bazalyq bilim deńgeiin anyqtaý úshin ótkiziledi. Sodan keiin olar oqytylady.
