Memlekettik "Daryn" jastar syilyǵynyń iegeri, Qazaqstan Jazýshylar Odaǵynyń Semei filialynyń tórǵasy, aqyn Merei Qart elimizde "Ádebiet akademiiasyn" ashýdy usyndy. Bul týraly ol búgin elordadaǵy «Nur álem» pavilonynda Elbasy Nursultan Nazarbaevtyń qatysýymen ótip jatqan «Táýelsizdik urpaqtary» atty jastar jylynyń ashylý saltanatynda aitty.
Merei Qart qazaq qalamgerleriniń "Rýhani jańǵyrý" baǵdarlamasy boiynsha aýqymdy jumystar atqaryp, óz úlesin qosyp jatqanyn atap ótti. Sondai-aq ol "Ádebi ólketaný" jobasy aiasynda shyǵarmashylyq ekspeditsiiaǵa qatysqanyn aita kelip, bul jobanyń aimaqtarymyzdyń tarihy men mádenietin, ótkeni men búginin nasihat etýdegi mán-mańyzyna toqtaldy.
"Qazaqtyń jas aqyn-jazýshylary memleket qoldaýynan kende emespiz. Qazaqstannyń jas aqyn-jazýshylary ultymyzdyń rýhaniiatyna, ádebietimizdiń damýyna úles qosyp júr. Mysaly, men ótken jyly ózińizdiń qoldaýyńyzben Qazaqstan jazýshylary qolǵa alǵan jalpy respýblikalyq "Ádebi ólketaný" jobasyna qatystym. Arnaiy Kereký jerine baryp, sol jerdiń ádebietimen, mádenietimen tanysyp, bir top shyǵarma jazdym. Tek qana men emes, respýblikamyzdyń ár aimaǵyndaǵy aǵa býyn aqyn-jazýshylar, jas qalamgerler osy jobaǵa qatysty. Elimiz týraly, jerimiz týraly shyǵarmalar dúniege keldi. Osyndai múmkindik bergen sizge barlyq qalamgerlerdiń atynan alǵysymdy bildirem.
Sóz oraiynda Qazaqstan Jazýshylar Odaǵy usynǵan biregei joba týraly aitqym keledi. Ádebiet áleminde jańa keńistik ashý maqsatynda jas qalamgerlerge arnalǵan "Ádebiet akademiiasyn" ashýdy usynamyn. Ádebiet akademiiasy ashylsa, jas aqyn-jazýshylarymyz bilimin shyńdap, álem filosoftarynyń, mádeniettanýshylarynyń ilimin boiyna sińirip, ádebietimizdiń áleýeti artyp, tyń óris alýyna septigin tigizer edi. Sol kezde jas qalamgerler jahandyq básekege qabiletti shyǵarmalardy dúniege ákeler edi", dedi jas aqyn.
Merei Qart óz sózinde Elbasynyń «Rýhani jańǵyrý» jáne «Uly dalanyń jeti qyry» maqalalary ár qazaqtyń júreginen oryn alǵanyn aita kele, alǵan áserin óleń joldarymen jetkizdi.
