«Damý» qorynyń qoldaýymen byltyr elimizde 5 trln 650 mlrd teńgeniń ónimi shyǵaryldy. Bul týraly qordyń basqarma tóraǵasy Gaýhar Bóribaeva osyndai kórsetkishti keltirdi, dep habarlaidy QazAqparat.
«Ótken jyly qazaqstandyqtardyń kásipkerlik áleýetin damytyp, biznes ashýyna kóp kóńil bólindi. Álemdik ekonomikada dál osy kezde shaǵyn jáne orta biznes –ekonomikanyń qozǵaýshy kúshi bolyp, jańa jumys oryndary ashylyp, halyqtyń ál-aýqatyn kóterýge yqpal etip otyr. 2019 jyly Úkimet qarapaiym zattar ekonomikasyna qatysty basymdyq bergen jobalardy nesieleýge arnalǵan baǵdarlamany iske qosty. «Biznestiń Jol kartasy 2025» baǵdarlamasy bekitildi. Biznesti damytýǵa sep bolatyn birqatar memlekettik baǵdarlama jetildirildi. «Damý» qory joǵaryda atalǵan baǵdardamalardy júzege asyrýda negizgi qarjylyq operator qyzmetin atqarady», - dedi Gaýhar Bóribaeva OKQ-da ótken baspasóz máslihatynda.
«Damý» qorynyń basqarma tóraǵasy óz sózinde 2019 jyldaǵy jumys qorytyndysyna toqtaldy.
««Damý» qory mikro, shaǵyn jáne orta kásipkerlikti qoldaýdy kózdeitin negizgi ulttyq institýt. Biz 4 qural usynamyz. Olar: jeńildikpen nesie berý, syiaqy mólsherlemesin sýbsidiialaý, nesiege kepildik berý, onlain oqytý men klientterdi qarjy institýtyna deiin súiemeldeý. Osy aitylǵan baǵyttar baǵyttar qolǵa alynǵaly beri «Damý» qory 5,3 trln teńgege 85 myń jobany qoldaǵan», - dedi ol.
Gaýhar Bóribaeva byltyr «Damý» qorynyń klientterdi qoldaýynyń arqasynda 5 trln 650 mlrd teńgeniń ónimi shyǵarylǵanyn, biýdjetke 457 mlrd teńge salyq tólenin, 9 myńǵa tarta jumys orny ashylǵanyn aitady.
