Qazaqstanda 81 myń jas jumyssyz júr. Bul týraly búgin Májilistegi Úkimet saǵatynda QR Aqparat jáne qoǵamdyq damý ministri Dáýren Abaev málim etti, dep habarlaidy "Ult aqparat".
«Jastar saiasaty tiimdiliginiń negizgi parametrleriniń biri – jastar jumyssyzdyǵy deńgeiin tómendetý. 2019 jyldyń II toqsanynda jastar jumyssyzdyǵy deńgeii 3,7 paiyzdy nemese 81 myń adamdy qurady. Jumyspen qamtylǵan jastar arasynda, bul 2 millionnan astam adam, 77 paiyzy – jaldamaly qyzmetkerler. Onyń ishinde 388 myń – saýda salasynda, 253 myń – aýyl sharýashylyǵynda, 239 myń – bilim salasynda, 218 myń – ónerkásip nysandarynda jumys isteidi. Qalǵan 23 paiyzy – ózin-ózi jumyspen qamtyǵandar», - dedi ministr.
Onyń dereginshe, jastar jumyssyzdyǵymen bailanysty problemalardy sheshý úshin «Jas kásipker» jáne «Jas maman» jobalaryn qosa alǵanda, birqatar baǵdarlamalyq sharalar kózdelgen. «Atameken» palatasynyń «Jas kásipker» jobasy aiasynda 20 myń adamdy oqytýǵa 1,5 mlrd teńge bólindi. Baǵdarlamanyń sharty boiynsha bilim alýshylardyń keminde 20 paiyzy biznesin iske qosýy tiis. Biznes jobalardy nesieleýge respýblikalyq biýdjetten 3 jyl merzimge 89 mlrd teńge bólindi.
«Bilim jáne ǵylym ministrliginiń «Jas maman» jobasy 210 myńnan astam jas qazaqstandyqty qamtidy. Jobada 200 jańǵyrtylǵan oqý oryndarynyń bazasynda asa suranysqa ie 100 indýstriialyq jáne servistik mamandyq boiynsha mamandar daiarlaý qarastyrylǵan. Bul - zamanaýi oqý jabdyqtarmen jaraqtalǵan 180 kolledj jáne 20 joǵary oqý orny», - dedi ol.
Osy oraida Abaev aralyq mindetterdi oryndaý úshin atqarylǵan is-sharalarǵa toqtaldy. Atap aitqanda, múddeli memlekettik organdar, «Atameken» Ulttyq kásipkerler palatasy jáne jumys berýshilerdiń salalyq qaýymdastyqtary ókilderiniń qatysýymen Bilim jáne ǵylym ministrligi janynan komissiia quryldy. Asa suranysqa ie 100 servistik jáne indýstriialyq mamandyqtar anyqtaldy.
«Bul jerde qandai mamandyqtar týraly sóz bolyp otyr? Birinshi orynda bizde kompiýterlik apparattyq qamtamasyz etý jónindegi injenerler, 3D modeldeý jónindegi injenerler, mashinaaralyq oqytý júieleri jónindegi injenerler, WEB jáne mýltimediialyq qosymshalardy ázirleýshiler tur. Joǵary tehnologiialyq salalardan basqa jumysshy mamandyqtaryna úlken suranys bar. Qazaqstanǵa qurylys boiaýshylary, aǵash ustalary, tas qalaýshy, montajdaýshylar jáne basqa da mamandar qajet», - dedi ministr.
Sondai-aq onyń aitýynsha, ákimdiktermen birlesip, «Jas maman» jobasyna qatysý úshin 180 kolledj jáne 20 joǵary oqý oryndarynyń aldyn ala tizimi anyqtaldy. Sheteldik seriktestermen kelissózder bastaldy. Tehnikalyq jáne kásiptik bilimi bar kadrlardy daiarlaý, qysqa merzimdi kásiptik oqytý, eńbek resýrstaryn qaita daiarlaý jáne qysqartylatyn qyzmetkerler erejeleri bekitildi.
«Bul jobany tiimdi júzege asyrý eńbek naryǵyn teńdestirýge, jastar jumyssyzdyǵyn, sheteldik jumys kúshin jaldaýdy, sondai-aq, qazaqstandyqtardyń reseilik joǵary oqý oryndaryna ketýin qysqartýǵa múmkindik beredi dep boljanýda», - dedi ol.
