Foto: ashyq derekkóz
IIM-niń aýmaqtyq bólimsheleri elimizdegi avtomektepterdiń qyzmetine tekserý júrgizdi. Qazirgi ýaqytta Qazaqstanda 727 avtomektep júrgizýshilerdi daiarlaidy, dep habarlaidy Ult.kz.
Tekserý barysynda birqatar zańbuzýshylyqtar anyqtaldy. Atap aitqanda, avtodromdarda jol belgileri, jol tańbalary men jaryqtandyrý talapqa sai emes ekeni belgili boldy. Sonymen qatar keibir oqý kólikteriniń tehnikalyq aqaýlary bary anyqtalǵan.
Kemshilikterdi joiý úshin 20 uiǵarym berildi. Budan bólek, júrgizýshilerdi daiarlaý kezinde mindetti tehnikalyq tekserýden ótpegen jáne saqtandyrý polisi joq avtokólikterdi paidalanǵan 59 oqý uiymy anyqtaldy.
Nátijesinde IIM Ákimshilik politsiia komiteti 701 oqý tobynyń qyzmetin toqtatty.
Avtomektepterdiń esebi men oqý toptaryn tirkeý "Avtomektep" aqparattyq júiesi arqyly júrgiziledi. Bul júie berilgen kýálikterdiń zańdylyǵyn, oqý baǵdarlamalaryn jáne oqý kólikterin onlain rejimde tekserýge múmkindik beredi.
Sonymen qatar avtomektepterdiń qyzmetine baqylaýdy kúsheitý maqsatynda "Jol júrisi týraly" zańǵa ózgerister engizý josparlanyp otyr. Zań jobasy avtomektepterdi ashýdy habarlama tártibinen ruqsat berý tártibine aýystyrýdy jáne memlekettik baqylaýdy kúsheitýdi kózdeidi. Qazirgi ýaqytta qujat Parlament Májilisinde qaralýda.
