Ótken jyly elimizde 68 myńnan astam memlekettik qyzmetshi bilimin jetildirdi. Bul týraly QR Prezidentiniń janyndaǵy memlekettik basqarý akademiiasynyń rektory Erlan Ábil QR Memlekettik qyzmet isteri agenttiginiń keńeitilgen alqa otyrysynda málim etti, dep habarlaidy QazAqparat.
«Ótken jyly akademiiada oqý baǵdarlamalary bekitilgen josparǵa sai iske asyryldy. Qańtardan qazanǵa deiin oqý onlain formatta, keiin aralas formatta ótti. Qysqa merzimdi oqytýdyń tiimdiligin kúsheitý maqsatynda akademiia koýchingtik tehnologiialar men assesment quraldaryn qoldana otyryp, korporativtik biliktilikti arttyrý seminarlaryn iske asyrý boiynsha jobalardy jalǵastyrdy. Mundai format kezinde tyńdaýshylar memlekettik organnyń naqty problemalaryn sheshýge qatysyp, toptyq jobalar jasaidy. 2021 jylǵy sáýir-shilde aralyǵynda akademiia jáne onyń filialdary QR Ádilet ministrligimen birlesip, QR ákimshilik rásimdik-protsestik kodeksiniń normalary boiynsha 68 myńnan astam memlekettik qyzmetshilerin oqytyp shyǵardy», - dedi Erlan Ábil.
Akademiia basshysynyń aitýynsha, odan 36 myńnan astam memlekettik qyzmetshi qysqa merzimdi oqytýdan ótti.
«Sonymen qatar biz ekologiia, geologiia jáne tabiǵi resýrstar ministrligimen birlesip, UN PAGE baǵdarlamasynyń (BUU-nyń Jasyl ekonomika boiynsha is-qimyl jónindegi áriptestigi) jáne halyqaralyq yntymaqtastyq jónindegi German qoǵamynyń qoldaýymen 700 memlekettik qyzmetshini, onyń ishinde Tájikstan, Qyrǵyzstan, Ózbekstan jáne Túrikmenstannan kelgen memlekettik qyzmetshilerdi oqytý boiynsha «Jasyl ekonomika jáne tómen kómirtekti damý» jobasyn iske asyrdyq», - deidi ol.
Odan bólek, rektor ótken jyly qazanda akademiiada memlekettik basqarý salasyndaǵy qazaqstandyq tájiribeni zerdeleý jáne ulttyq jobalardy iske asyrý maqsatynda Reseidiń basqarýshy kadrlary rezerviniń joǵary deńgeiin daiarlaý baǵdarlamasy boiynsha taǵylymdama uiymdastyrylǵanyn aityp ótti.
