Bilim jáne ǵylym ministri Ashat Aimaǵambetov Prezident tapsyrmalaryn oryndaý úshin qandai jumystar atqarylatynyn aitty, dep habarlaidy "Ult aqparat".
«Memleket basshysy Q.Q. Toqaev Májilis otyrysynda sóilegen sózinde Úkimet aldynda birqatar mańyzdy tapsyrma júktedi. Bizdiń ministrlik aldyna sapaly bilim alýǵa qol jetkizýdi qamtamasyz etýge baǵyttalǵan mindetter qoiyldy. Biz osy tapsyrmalardy oryndaýǵa kiristik, bul týraly ótken Úkimet otyrysynda baiandadym.
Qysqasha toqtalyp óteiin. Prezidenttiń tapsyrmasyna sáikes qyzmetterin oryndaý kezinde qaza tapqan áskeri qyzmetshilerdiń, quqyq qorǵaý jáne arnaýly memlekettik organdar qyzmetkerleriniń balalaryna, joǵary oqý oryndary men kolledjderde oqýy úshin grant berý jónindegi normany qabyldaý josparlanýda.
Memleket tarapynan mundai qoldaý qajetti shara bolyp tabylatynyna senimdimin. Jaqynda bolǵan qaiǵyly oqiǵalar kezinde biz olardyń erliginiń kýási boldyq, azamattardy óz ómirin aiamai qorǵady», - dep jazdy Aimaǵambetov Facebook paraqshasynda.
Ministr kadr tapshylyǵy baiqalatyn jáne bilim sapasynda úlken alshaqtyq bar óńirlerge úzdik pedagogterdi tartý máselesine qatysty da toqtalǵan. Prezident tapsyrmasy boiynsha qoldaý sharalarynyń tiisti paketimen osy óńirlerge úzdik pedagogterdi tartý jóninde arnaiy baǵdarlama ázirlenip jatyr.
«Pedagogterdiń osy salalarda jumys isteýine múddeli bolýy úshin biz jalaqyny arttyrý koeffitsientin belgileý, turǵyn úi berý nemese turǵyn úidi jalǵa alý qunyn óteý, kommýnaldyq qyzmetterdi tóleý ótemaqysy jáne t.b. osy siiaqty áleýmettik qoldaý sharalaryn usynamyz.
Mundai áleýmettik paket arnaiy rásimnen ótip, belgili bir ólshemderge sáikes keletin jáne belgili bir mektepterge jumysqa aýysatyn muǵalimderge beriledi. Naqty iske asyratyn keibir tetikterin áli de talqylyityn bolamyz», - dedi ol.
Memleket basshysynyń birqatar tapsyrmalary joǵary bilim berýdi damytýǵa qatysty boldy.
«Taǵy bir baǵyt – 5 sheteldik JOO filialdaryn ashý. Bul shara otandyq ýniversitetter arasynda básekelestikti arttyrýǵa da múmkindik beredi. Biz osy baǵyttaǵy jumysqa kiriskenimizdi atap ótkim keledi.
2021 jyldyń qyrkúieginde De Montfort Lester Britan ýniversitetiniń (De Montfort University Leicester) filialy ashyldy. Sonymen qatar, Qozybaev atyndaǵy ýniversitetti Arizona ýniversitetine senimgerlik basqarýǵa berý máselesi pysyqtalýda.
Elimizdiń batys óńirlerindegi jastardyń joǵary bilimge qol jetkizýin arttyrý úshin onda eki jetekshi sheteldik tehnikalyq ýniversitettiń filialdary ashylatyn bolady.
Sondai-aq, Prezidenttiń tapsyrmasyna sáikes Reseidiń úzdik tehnikalyq ýniversitetiniń filialyn ashý boiynsha jáne basqa da álemdik deńgeidegi ýniversitetterdiń filialdaryn ashý boiynsha jumys júrgizilýde.
Sondai-aq, bilim sapasynda úlken alshaqtyǵy bar óńirlerden oqýǵa túsýshiler úshin tehnikalyq daiyndyq baǵyttary boiynsha qosymsha granttar bólý josparlanýda.
Atalǵan maqsatty granttar elimizdiń jetekshi joǵary oqý oryndarynda bilim alý úshin bólinetin bolady. Bul rette negizgi turǵylyqty jeri boiynsha bitirýshilerdiń jumyspen qamtýdy sharttardyń biri retinde bekitý usynylady.
Aǵymdaǵy jyldyń ózinde tehnikalyq daiyndyq baǵyttary boiynsha joǵary oqý oryndarynda oqý úshin granttar sany aitarlyqtai ósetin bolady», - dep atap ótti ministr.
