Parlament Senatynyń jalpy otyrysynda «Táýelsiz Memleketter Dostastyǵyna qatysýshy memleketterdiń bas bostandyǵynan aiyrýmen bailanysty emes jazalardy oryndaýdy berý týraly konventsiiasyn ratifikatsiialaý týraly» Zańy qabyldandy, dep habarlaidy "Ult aqparat".
«Konventsiianyń negizgi maqsaty – ár azamatqa óz jazasyn turǵylyqty jeri boiynsha óteýge múmkindik berý. Konventsiiaǵa Ashǵabat qalasynda 2019 jyly Resei, Armeniia, Belarýs, Qazaqstan, Qyrǵyzstan, Ózbekstan prezidentteri qol qoidy.
«Konventsiiaǵa sáikes, sottalýshy nemese onyń zańdy ókili jazany turǵylyqty jerinde óteý týraly ótinish beredi. Ótinish boiynsha sol eldiń Bas prokýratýrasy suraý salady. Suraý salýǵa myna qujattar qosa beriledi: sottalýshynyń azamattyǵy, onyń jazbasha kelisimi, sot sheshiminiń kóshirmesi, minezdeme, keltirilgen shyǵyn týraly málimetter. Jazasyn óteýshini qabyldaityn memleket belgilengen jazadan qatań emes jaza taǵaiyndaidy», - dedi QR Ishki ister ministri Erlan Turǵymbaev.
Onyń aitýynsha, jazasyn óteýshi sheshim qabyldanǵan soń 45 kún ishinde óz betinshe elden shyǵýy tiis. Al eger bul talap oryndalmasa, zań boiynsha májbúrli túrde elden shyǵarylady.
Suraý salýdan bas tartý negizderi de qarastyrylǵan:
• Ulttyq zańnamaǵa sáikes, jazasyn óteýshiniń áreketi qylmys bolyp tabylmasa;
• Qylmystyń merzimi ótip ketse;
• El táýelsizdigine, ulttyq qaýipsizdikke qaýip bolsa;
• Jazasyn óteý merzimi 6 aidan az bolsa;
• Ulttyq zańnamaǵa qaishy ózge de jaǵdailarda bas tartylady.
«Qazirgi ýaqytta elimizde 447 shetel azamaty probatsiiada tur. Ózbekstannan 216, Reseiden 138, Qyrǵyzstannan 38, Armeniiadan 5 azamat. Al ózge elderde 280 Qazaqstan azamaty jazaǵa tartylǵan. Reseide 251, Ózbekstanda 24, Qyrǵyzstanda 2, Belarýste 3 azamat», - dep naqtylady ministr.
«Taǵy bir atap ótetin másele – dúniejúzinde osyndai álemdik tájiribe bar. Eýroodaqqa múshe memleketter osy Konventsiiaǵa uqsas Deklaratsiia qabyldaǵan. Osy Zańdy qabyldaý - jazasyn óteýshilerdi turǵylyqty jeri boiynsha qaitarýǵa, olardyń qoǵamǵa tiimdi oralýyna múmkindik beredi», - dedi Erlan Turǵymbaev.
