Ótken jyldan beri elimizdiń aýmaǵynda alkogol ónimderin jasyryn jolmen daiyndaityn 50-den astam tseh joiyldy. Bul týraly QR Qarjy ministrligi Qarjy monitoringi komitetiniń tóraǵasy Janat Elimanov aitty, dep habarlaidy QazAqparat.
«Zańsyz ainalymnan 1,5 millionnan astam bótelke ishimdik, shamamen 400 myń litr spirt, sonymen qatar 500 myńnan astam jalǵan esepke alý-baqylaý markasy alyndy», - dedi ol búgin Ortalyq kommýnikatsiialar qyzmetindegi baspasóz máslihatynda.
Máselen, komitet tóraǵasynyń dereginshe, Aqtóbe qalasynda araq óndirýshilerdiń biri esepke alynbaǵan 700 myńnan astam bótelke araq daiyndaǵan.
«Salyq tólemeýden keletin shyǵyn 570 mln teńgeni quraidy. Shymkent qalasynda sapasy tómen spirt daiyndaityn jasyryn tseh joiyldy. Quny 31 mln teńge bolatyn 25 tonna spirt tárkilendi. Almaty oblysynda azamat Malashkin men Qarshyǵaev 40 tonnadan astam spirtti zańsyz tasymalǵandary jáne satqandary úshin qylmystyq jaýapkershilikke tartyldy. Mundai mysaldar óte kóp. Bul sharalardyń barlyǵy kóptegen azamattyń ómiri men densaýlyǵyn saqtap qalýǵa múmkindik berdi», - dedi Janat Elimanov.
