Almatyda onlain formatta qala ákiminiń orynbasary Erjan Babaqumarovtyń tóraǵalyǵymen saiasi repressiia qurbandaryn aqtaý máselesin jan-jaqty zerdelep, ony sheshý maqsatynda qurylǵan arnaiy qalalyq komissiianyń birinshi otyrysy ótti, dep habarlaidy "Ult aqparat".
Jiynda 2021 jylǵa arnalǵan jumys jospary pysyqtaldy.
Qalalyq komissiianyń tóraǵasy Erjan Babaqumarov QR Prezidenti Qasym-Jomart Toqaevtyń 2020 jyldyń 24 qarashasyndaǵy «Saiasi qýǵyn-súrgin qurbandaryn tolyq aqtaý jónindegi memlekettik komissiia týraly» Jarlyǵyna sáikes komissiia jumysy keńestik kezeńdegi saiasi qýǵyn-súrgin qurbandarynyń barlyq sanattaryna qatysty tarihi ádildikti qalpyna keltirýdi kózdeitinin atap ótti.
Qalalyq komissiianyń quramyna tanymal tarihshylar, ǵylymi institýttar men qoǵamdyq uiymdardyń ókilderi engen.
«Bul komissiianyń jumysyn durys júrgizý úshin ádisnamalyq komissiia quryldy. Nur-Sultan qalasynda ortalyq keńse ashyldy. Bir apta buryn Almatyda osy keńseniń ókildigi ashyldy, onyń bazasynda bizdiń qalamyzda ornalasqan segiz jumys tobynyń ókilderi jinalyp, pikir almasty. Bul úrdis aldaǵy ýaqytta da jalǵasyn tabady. Memlekettik komissiia tóraǵasynyń buiryǵymen qazirgi ýaqytta respýblikada on bir jumys toby jumys isteidi. Sonymen qatar, ár oblys ortalyǵynda jumys toptary bar», - dedi Sh. Ýálihanov atyndaǵy Tarih jáne etnologiia institýtynyń direktory, tarih ǵylymdarynyń doktory, professor Ziiabek Qabyldinov.
Jiynǵa sondai-aq, tarih ǵylymdarynyń doktory, professor, Ulttyq ǵylym akademiiasynyń akademigi Hangeldi Ábjanov, saiasi qýǵyn-súrginge ushyraǵan qazaqstandyq intelligentsiianyń murasyn zertteitin «Arys» qorynyń tóraǵasy Ǵarifolla Ánes, Abai atyndaǵy Qazaq ulttyq pedagogikalyq ýniversitetiniń kafedra meńgerýshisi, t. ǵ. d. Baýyrjan Janǵutdinov, QR Prezidenti muraǵaty direktorynyń orynbasary Qairat Álimǵazinov, ortalyq memlekettik muraǵat direktorynyń orynbasary Márziia Jylysbaeva, Almaty qalasy memlekettik muraǵatynyń direktory Abzal Botanov qatysty.
Aita keteiik, Qazaqstanda saiasi qýǵyn-súrgin jáne asharshylyq qurbandaryn eske alý kúni jyl saiyn 31 mamyrda atap ótiledi.
