Qazaqstanda 45 ónerkásiptik qala bar jáne onyń 10-ynda atmosferalyq aýa lastanýynyń eń joǵarǵy deńgeii tirkeldi. Bul týraly QR Ekologiia, geologiia jáne tabiǵi resýrstar ministri Serikqali Brekeshev aitty, dep habarlaidy QazAqparat.
«Klimattyń ózgerýi men kómirtektik beitaraptyqqa qol jetkizý máseleleriniń sheshimin ekologiialyq problemalardy sheshý arqyly taba alamyz. Qazaqstandaǵy negizgi ekologiialyq problemalar atmosferalyq aýanyń lastanýy, jerústi sýlary jáne qaldyqtarmen jumys isteý júiesiniń nasharlyǵy bolyp otyr», - dedi ministr Úkimet otyrysynda.
Atmosferalyq aýa monitoringine sáikes, 45 ónerkásiptik qalanyń ishinde 10-y atmosferalyq aýa lastanýynyń joǵary deńgeiin kórsetýde. Olar – Nur-Sultan, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan jáne Shymkent qalalary.
«Lastanýdyń basty sebepteri – jabdyqtardyń tozýy, zaýyttardaǵy shań tazartý qondyrǵylary jumysynyń tiimsizdigi, jańǵyrtý men qaita qurýdyń bolmaýy jáne kómirdi paidalaný. Jerústi sýlarynyń lastanýynyń negizgi sebebi – kárizdik-tazartý qurylys jailarynyń tozýy bolyp otyr. Al qaldyqtarmen jumys isteý salasynda qatty turmystyq qaldyqtar poligondarynyń sanitarlyq jáne ekologiialyq talaptarǵa sáikes kelmeýi, olardy óńdeý deńgeiiniń tómendigi jáne stihiialyq úiindiler problemalary ózekti bolyp tur», - dedi S. Brekeshev.
