Qazaqstanda maýsymǵa deiin 1 myńǵa jýyq lombardtyń qyzmeti tekseriletin bolady, dep habarlaidy QazAqparat.
«QR Prezidenti Qasym-Jomart Toqaevtyń tapsyrmalaryn júzege asyrý aiasynda shaǵyn qarjy uiymdary, lombardtar, onlain kredit kompaniialarynyń qyzmeti tekseriletin bolady. Sonymen qatar 23 naýryzdaǵy tapsyrmaǵa sáikes halyqqa tutyný nesielerin usynatyn bankke jatpaityn uiymdardyń qyzmeti baqylaýǵa alynady. Olardyń qyzmetiniń zańdylyǵy, qarjylyq piramida belgileriniń bar-joqtyǵy anyqtalady», - dedi onlain brifing barysynda QR Qarjy naryǵyn damytý jáne retteý agenttiginiń basqarma tóraǵasynyń orynbasary Nurlan Ábdrahmanov.
Onyń aitýynsha, tekserý jumystary Qazaqstannyń 17 qalasynda naýryzdan maýsymǵa deiin jalǵasady. Tekseriletin lombardtar men shaǵyn qarjy uiymdarynyń kópshiligi Nur-Sultan, Almaty, Shymkent qalalarynla ornalasqan.
Naýryzda Agenttik, QR IIM, QR QM Memlekettik kirister komitetiniń ókilderinen 39 tekserý toby quryldy.
«1100 lombardtyń 424-i – sáýirde, 323 – mamyrda, 353-i maýsymda tekseriledi. Sonymen qatar 50 jýyq onlain nesie berý uiymy, 200 shaǵyn qarjy uiymy tekseriledi», - dedi ol.
Eń aldymen reid barysynda nesiesin óteý múmkindiginen airylǵan ShOB sýbektileriniń tólemderin toqtatý týraly tapsyrma qanshalyqty oryndalyp jatqany anyqtalady.
Zań talaptaryn buzý derekteri anyqtalǵan bolsa olarǵa tiisti jaza qoldanylatyn bolady.
