Kúzdiń ekinshi aiynda Qazaqstanda birqatar jańashyldyq kúshine enedi.
Politseiler attestatsiiadan ótedi
Osy jyldyń 1 qazany men 2020 jyldyń 31 naýryzy aralyǵynda politsiianyń jeke quramy kezekten tys attestatsiiadan ótedi.
Alǵashynda quqyq qorǵaý organdary qyzmetkerleriniń attestatsiiasy 2019 jyldyń 1 qyrkúiegine deiin ótýi tiis bolatyn. Elbasy Nursultan Nazarbaev tiisti jarlyqqa otstavkaǵa keter aldynda qol qoiǵan edi. Alaida 2 sáýirde Qazaqstannyń qazirgi prezidenti Qasym-Jomart Toqaev attestatsiia merzimin ózgertti.
Attestatsiia úsh kezeńnen turady jáne birinshi basshylar men politsiia departamentteri basshylarynan bastalady.
Attestatsiia barysynda tártip saqshylarynyń zańdy bilýi men logikalyq oilaý qabileti tekseriledi. Budan bólek, fizikalyq daiarlyǵy men oq atý qabileti synalady. Ashyqtyq úshin attestattaýdyń barlyq kezeńi videoǵa túsirilmek.
Kásiporyndar onlain baqylaý-kassalyq mashinalarǵa kóshedi
2019 jyldyń 1 qazanynan 224 qyzmet túri onlain baqylaý-kassalyq mashinalaryn qoldana bastaidy.
Buǵan deiin sáýir aiynan 323, al shildeden bastap 86 qyzmet túri onlain BKM-ǵa aýysty.
Onlain baqylaý-kassalyq mashinalaryn qoldaný talaby ortaq paidalaný telekommýnikatsiia jelileri joq aýmaqta qyzmetin júzege asyratyn salyq tóleýshilerge qatysty emes.
Áýejai kody ózgerýi múmkin
Osy aida Nursultan Nazarbaev atyndaǵy elorda áýejaiy Halyqaralyq áýe kóligi qaýymdastyǵynan (IATA) jańa úsh áripti kod alýy múmkin. Buǵan deiin Nur-Sultanǵa reis oryndaityn áýe kompaniialar kodtyń ózgerýin quptaǵan edi.
Bul másele 14 qazanda Polsha astanasy Varshavada ótetin Jolaýshy standarttary konferentsiiasynda óz sheshimin tabady dep josparlanyp otyr.
Nan kúni
Jýyrda Qazaqstannyń merekeler tizimi taǵy bir datamen tolyqty. Úkimet qaýlysyna sáikes, endi qazaqstandyqtar jyl saiyn 16 qazanda Nan kúnin toilaidy.
Sondai-aq, qarashanyń úshinshi jeksenbisi – Aýyl sharýashylyǵy, tamaq jáne óńdeý ónerkásibi qyzmetkerleri kúni bolyp bekitildi.
Elektr energiiasynyń shekti tarifi
Búginnen bastap elektr energiiasynyń 2025 jylǵa deiingi shekti tarifteri kúshine endi.
Energetika ministriniń 2019 jylǵy 23 qyrkúiektegi buiryǵymen "Elektr energiiasynyń shekti tarifterin bekitý týraly" buiryqqa ózgerister engizilgen bolatyn.
Energiia óndirýshi uiym elektr qýatyn satý baǵasyn ózi belgileidi. Alaida ol energiia óndirýshi uiymdardyń tiisti tobynyń shekti tarifinen asyp ketpeýi tiis.
