Qazaqstan joldarynda intellektýaldy jaiaý júrginshiler joly, interaktivti jáne 3D formattaǵy jol belgileri pilottyq rejimde engiziledi. Bul týraly QR Ishki ister ministrligi aityp berdi, dep habarlaidy "Ult aqparat".
«Ishki ister ministrliginde Indýstriia jáne infraqurylymdyq damý ministrliginiń, «Qazavtojol» ulttyq kompaniiasynyń, elimizdiń birqatar salalyq joǵary oqý oryndarynyń ókilderimen jol qaýipsizdigin qamtamasyz etý máseleleri boiynsha vedomstvoaralyq seminar-keńes ótti. Avtomobil joldarynyń qaýipsizdigin arttyrý maqsatynda IIM mamandary sheteldik ozyq tájiribeni zerttep, Almaty, Jambyl jáne Shyǵys Qazaqstan oblystarynyń joldarynda pilottyq jobany iske qosýdy usyndy», - dedi QR IIM resmi ókili Nurdildá Oraz onlain brifingide.
Onyń aitýynsha, ozyq tehnikalyq sheshimder shynaiy ómirde testilenip, qazaqstandyq joldardyń erekshelikterine beiimdeledi. Olardyń ishinde – proektsiialyq jáne intellektýaldy jaiaý júrginshiler joly, balamaly jol belgileri, sonyń ishinde kólemdi 3D format, interaktivti jol belgileri jáne t.b. bar.
«Ishki ister organdarynyń statistikasy boiynsha, jyl basynan beri 3 aida respýblikada 2 621 jol-kólik oqiǵasy boldy, onda 363 adam qaza taýyp, 3 605 adam jaraqat aldy. Ótken jyldyń sáikes kezeńimen salystyrǵanda qaza bolǵandar sany 11,7%-ǵa ósken. Jol-kólik oqiǵalarynyń basty sebepteri – jyldamdyqty asyrý, qarsy jolaqqa shyǵý jáne jol qiylystarynan ótý kezindegi júrgizýshilerdiń ereje buzýy bolyp otyr», - dedi resmi ókil.
