Elimizde sybailas jemqorlyqty boldyrmaý baǵytynda qolǵa alynyp jatqan is-sharalarǵa shet memleketter qyzyǵýshylyq tanytýda. Sonyń biri Iordaniia memleketi. Qazaqstannyń paraqorlyqpen kúres jolyndaǵy tájiribesine qatysty Iordan Hashimit Koroldiginiń Qazaqstan Respýblikasyndaǵy Tótenshe jáne Ókiletti Elshisi Iýsýf Mýstafa Abdelǵani óz oiyn bildirdi, dep habarlaidy QazAqparat.
«Qazaqstannyń sybailas jemqorlyqqa qarsy kúres jumystarymen biz tanyspyz. Onyń dáleli halyqaralyq reitingte Qazaqstan 180 eldiń ishinde 94 orynǵa ie boldy. Iaǵni burynǵydan 9 pozitsiiaǵa kóterilgen. Sybailas jemqorlyqpen kúreste Qazaqstandy Ortalyq Aziia elderiniń ishinde kósh bastap tur desek bolady. Óz kezeginde Iordaniia bul jańalyqty qýana qabyldaidy», - dedi Iýsýf Mýstafa Abdelǵani «Antikor» alańynda onlain ótken baspasóz máslihatynda.
Suhbat barysynda belgili bolǵandai, qazaqstandyq «AntikorNews» jobasy Iordaniiada da júzege asyrylyp jatyr.
«AntikorNews» - óte qajetti joba. Bizdegi adaldyq jáne sybailas jemqorlyqqa qarsy kúres komiteti osy jobamen tanysyp, qyzyǵýshylyq tanytyp otyr. Iaǵni, ózara tájiribe almasý kózdelýde. Qazaqstanda sybailas jemqorlyqpen kúres zańnamasy jyl saiyn jetildirilip otyrady. Biz buny BAQ arqyly estip-bilip otyramyz. Sonyń biri sizderde memlekettik qyzmetkerlerge syi-qurmet kórsetýge tyiym salynǵan. Sizderdegi taǵy bir jańalyq, qol astyndaǵy qyzmetkerdiń jemqorlyq áreketi úshin basshynyń tikelei jaýap berýi nemese qyzmetinen ketýi», - deidi ol.
Sondai-aq, elshi jemqorlyqqa qarsy kúreste profilaktikalyq is-sharalardyń mańyzyna toqtala kele, aldyn alý sharalaryn mektepten bastaý kerektigin alǵa tartty.
