Foto: Mádeniet jáne aqparat ministrligi
Almatyda Qazaqstan Jazýshylar odaǵynyń 90 jyldyq mereitoiyna arnalǵan saltanatty shara ótti. Oǵan Qazaqstan Respýblikasynyń Memlekettik keńesshisi Erlan Qarin, Mádeniet jáne aqparat ministri Aida Balaeva, TÚRKSOI halyqaralyq uiymynyń bas hatshysy Sultan Raev, Eýraziia Jazýshylar odaǵynyń prezidenti Ýfýk Týzman qatysty, dep habarlaidy Ult.kz.
Memlekettik keńesshi Erlan Qarin Qazaqstan Respýblikasynyń Prezidenti Qasym-Jomart Toqaevtyń Odaqtyń 90 jyldyǵyna orai joldaǵan quttyqtaý hatyn oqyp berdi.
Memleket basshysynyń hatynda «Jazýshylar odaǵy – rýhaniiatymyzdyń altyn dińgegi. Bul uiym qalamgerlerimizdiń kásibi qaýymdastyǵy retinde tól ádebietimiz ben mádenietimizdi órkendetýge jáne ony álemge tanytýǵa zor yqpal etedi. Sóz óneriniń qarashańyraǵyn ulttyq biregeiligimizdiń berik tuǵyry deýge bolady.
Foto: Mádeniet jáne aqparat ministrligi
Qazir biz ulttyń jańa sapasyn qalyptastyryp jatyrmyz. Ozyq oily urpaq tárbieleý isinde ziialy qaýym airyqsha ról atqarýy kerek. Osy jaýapkershilikti tereń sezinip, adamgershilik qundylyqtardy keńinen dáriptep júrgen barsha qalamgerlerge shynaiy rizashylyǵymdy bildiremin» delingen.
Budan soń Qyrǵyz Respýblikasy Prezidentiniń keńesshisi Arslan Qoishiev Qyrǵyz Respýblikasynyń Prezidenti Sadyr Japarovtyń quttyqtaýyn oqydy.
Saltanatty sharaǵa shetelden arnaiy qonaqtar – Túrkiia Jazýshylar odaǵynyń Tóraǵasy Mýsa Kazym Aryjan, Qytai Halyq Respýblikasy Jazýshylar odaǵy Basqarmasynyń múshesi, Qazaqstannyń qurmetti jazýshysy Ákbar Májit, Ázirbaijan Jazýshylar odaǵynyń Tóraǵasy Anar Rzaev, Ázirbaijan Jazýshylar Odaǵynyń hatshysy Rashad Majitov, Ózbekstan Jazýshylar odaǵy Tóraǵasynyń orynbasary Majid Gairat, Ózbekstannyń Halyq jazýshysy Ýsmankýl Azimov, shved jazýshysy, ádebiet zertteýshisi Paýel Friies, Qyrǵyz Respýblikasy Ulttyq Jazýshylar odaǵynyń Tóraǵasy Qanybek Imanaliev, Qyrǵyzstannyń El jazýshysy, Qyrǵyzstan Respýblikasy Prezidentiniń keńesshisi Arslan Qoishiev, Resei jazýshysy Andrei Reizvyh, Tatarstan Jazýshylar odaǵynyń Tóraǵasy Rkail Zaidýllin, Bashqurtstan Jazýshylar odaǵynyń Tóraǵasy Aigiz Baimýhametov, Iakýtiia Jazýshylar odaǵynyń Tóraǵasy, «Cholbon» jýrnalynyń bas redaktory Gavril Androsov, Chývash Respýblikasy Jazýshylar odaǵy basqarma tóraǵasynyń orynbasary Vasilii Zaharov, sondai-aq elimizdiń túkpir-túkpirinen kelgen aqyn-jazýshylar, qoǵamdyq uiymdar men kásipkerlik ókilderi de qatysty.
Foto: Mádeniet jáne aqparat ministrligi
Jazýshylar odaǵynyń tóraǵasy Mereke Qulkenov óz baiandamasynda «Búginde biz Ádiletti Qazaqstanǵa qadam bastyq. Qazirgi qazaq ádebieti de jańarý ústinde dep nyq senimmen aita alamyz. Tyń da tosyn taqyryptar, jańa janrlar, sony stilder, ambitsiiasy zor avtorlar ádebi protseske jańasha serpin berýde» dep atap ótti.
Aita keteiik, Qazaqstan Jazýshylar odaǵynyń tarihy 1934 jyly 12-18 maýsymda Almatyda ótken Qazaqstan Jazýshylarynyń I Sezinen bastalady. Ár jyldary Odaqty belgili qalamgerler I.Jansúgirov, Ǵ.Toǵjanov, S.Muqanov, T.Dúrimbetov, M.Qarataev, D.Ábilev, Á.Tájibaev, Á.Jaimýrzin, Ǵ.Mustafin, Ǵ.Músirepov, Á.Sháripov, Á.Álimjanov, J.Moldaǵaliev, O.Súleimenov, Q.Naimanbaev, N.Orazalin, U.Esdáýlet basqarǵan.
Qazirgi tańda Jazýshylar odaǵy – 1015 múshesi bar elimizdegi eń iri shyǵarmashylyq birlestikterdiń biri. Odaqqa qaraityn «Qazaq ádebieti» gazeti, «Juldyz», «Prostor», «Jalyn» jýrnaldary óner men ádebiettiń jarshysyna ainaldy.
Foto: Mádeniet jáne aqparat ministrligi
